Foro Asturias proclama a Álvarez-Cascos como candidatu a la presidencia del país

Francisco Álvarez-Cascos yá ye candidatu a la presidencia del país por Foro Asturias. La Comisión Direutiva de la formación nueva proclamó de manera oficial les persones que van encabezar les llistes a la Xunta Xeneral y a 24 alcaldíes.
 
D’esta forma, Foro Asturias da’l pasu definitivu pa qu’Álvarez-Cascos sía’l candidatu de la formación pa dirixir el país pelos cuatro años próximos, como taba previsto. El ex ministru de Fomentu sonó pa lliderar la candidatura del PP, pero la oposición de los dirixentes populares n’Asturies y la escoyeta d’Isabel Pérez-Espinosa como númberu ún a les eleiciones, llevó a un seutor ampliu de descontentos a crear Foro Asturias.
 
La Comisión Direutiva tamién confirmó güei como candidatos a Carmen Moriyón (Xixón), Arturo González de Mesa (Uviéu), Pablo Sánchez Lorda (Avilés), Enrique Fernández Muñiz (Mieres), Miguel Vázquez (Siero) y Pedro Leal (Llangréu), ente otros. La vicesecretaría xeneral d’Aición Seutorial va tar dirixida por Javier Canal; José Manuel Fernández Arias va tar al frente del Área ‘Enerxía; José Manuel Rivero, d’Industria; y Pelayo Roces, del Área d’Infraestructures de Tresporte. El númberu de afiliaos de Foro Asturias algama yá les 8.728 persones.