Foro Asturias Ciudadano quier que na Mesa de la Xunta Xeneral tean representaos tolos partíos

La Comisión Direutiva de Foro Asturias Ciudadano (FAC) ufrió al PP la secretaría primera de la Mesa de la Xunta Xeneral. El partíu de Francisco Álvarez-Cascos quier que los cuatro grupos tengan representación nella.
 
La formación que ganó les eleiciones n’Asturies quedaría cola presidencia y la vicepresidencia primera de la Mesa, ensin entrar en consideraciones acerca de la decisión de los otros dos grupos que consiguieron entrar na Xunta Xeneral, PSOE y IX-LV. Sicasí, FAC cree conveniente la presencia de toos na Mesa, que va constituise’l 15 de xunu nuna sesión que va principiar a les 12 hores.
 
No que respeuta a la composición de les comisiones, les sos meses y los sos miembros, Foro Asturias propón que se distribuya con criterios de proporcionalidá ente los cuatro grupos, asina como les representaciones n’otros órganos nos que’l númberu de miembros lo permita. La formación presidida por Francisco Álvarez-Cascos propunxo que les comisiones parllamentaries formaes por 15 miembros tean compuestes por un miembru d’IX-LV, trés del PP, cinco del PSOE y seis suyos.
 
Nel casu del Procurador Xeneral, considera conveniente promover un candidato de consensu ente tolos partíos. La Comisión Direutiva tamién acordó promover una reunión conxunta pa consensuar la eleición de los miembros d’instituciones que requieren mayoríes reforzaez –Sindicatura de Cuentes, Conseyu Consultivu, ERA o RTPA– dao que podría ser necesariu’l votu de más de dos grupos p’algamar eses mayoríes.