Foro Asturias buzonea per Xixón propaganda eleutoral na que llama “fracasada” a Pilar Fernández Pardo

Los vecinos de la zona centru de Xixón tán recibiendo estos díes propaganda eleutoral de Foro Asturias na que se critica duramente a Pilar Fernández Pardo y al PP. El panfletu fala de la popular como "la fracasada candidata municipal" .
 
El testu, que vien acompañáu del titular de la noticia del diario ‘El Comercio’ del 14 de setiembre que reza “La oposición carga conta la alcaldesa por no explicar al Pleno su actividad médica” y una semeya de la intervención de Fernández Pardo nuna rueda de prensa xunto colos cabezaleros de la izquierda llocal Santiago Martínez Argüelles (PSOE) y Jorge Espina (IX-LV), resalta que “El Partido Popular lidera en Gijón la oposición a FORO” pa, a continuación, asegurar que “la foto no miente. La lideresa de la oposición es Pilar Pardo, la fracasada candidata municipal y diputada saliente del PP”. A continuación, el panfletu califica de “miserable” l’acusación de la popular a l’alcaldesa, Carmen Moriyón, poles operaciones quirúrxiques que fai nel Hospital Begoña nel so tiempu llibre.
 
“Este es un ejemplo más de la política destructiva de ‘mano tendida’ que practica el Partido Popular en Asturias y en Gijón”, continúa l’escritu de Foro Asturias, que termina cola frase “el próximo 20 de noviembre en las urnas tienes la oportunidad de apoyar a quien lo merece”. Hai que destacar que Carmen Moriyó algamó l’alcaldía de Xixón gracies a los votos del grupu popular, yá que’l PSOE foi la fuercia más votada nes eleiciones del mes de mayu.