Foro astiénse na votación de les enmiendes a la totalidá de los Presupuestos Xenerales del Estáu

|

El Partido Popular (PP) tumbó les once enmiendes a la totalidá de los Presupuestos Xenerales del Estáu gracies a la so mayoría absoluta. Namái tuvo’l sofitu de la Unión del Pueblo Navarro (UPN), mentes que Foro astúvose na votación.

Tres casi ocho hores de debate nel hemiciclu de la Cámara baxa, los populares nun llograron convencer a nengún de los grupos pa que retirara la so enmienda, col apoyu únicu d’UPN –sociu natural del PP en Navarra– y l'astención de Foro de Ciudadanos que, sicasí, nun va renunciar a presentar enmiendes parciales al testu. El ministru de Facienda, Cristóbal Montoro, aprovechó la so última intervención p'agradecer l'apoyu del PP y UPN al so proyeutu y tamién l'astención crítica del diputáu asturianu Enrique Álvarez Sostres. Too ello ante un sonriente presidente del Gobiernu, Mariano Rajoy, qu'acudió a la Cámara pa la votación.

"Nun son tiempos fáciles, nin pa tar nel Gobiernu nin pa exercer la política. Pero eso ye precisamente lo que se-y esixe a la política en democracia: respuestes a los tiempos difíciles. Y el proyeutu de Presupuestos pretende ser esa respuesta y abrir una puerta d'oportunidaes y confianza na sociedá española", esplicó. Amás, sorrayó la importancia de la estabilidá política actual, garantizada pola mayoría absoluta del PP nes dos cámares, pola “seguridá, confianza y fiabilidá" qu'eso aporta, y tamién animó a los "grupos críticos" coles cuentes del Executivu a que, nel trámite parllamentariu d'enmiendes parciales, "espongan les sos posiciones concretes en materia de gastos y ingresos públicos".

Unes cuentes irreales, según la oposición

El restu de formaciones con representación nel Congresu apoyaron les enmiendes a la totalidá presentaes por PSOE, Izquierda Plural (IX-ICV-CHA), CiU, UPyD, PNV, Amaiur, BNG, ERC, CC-NC, Compromís-Equo y Geroa Bai. L'argumentu más xeneralizáu pa refugar los presupuestos ye que les previsiones sobre les que s'apoyen –PIB, paru, ingresos o esportaciones– nun van cumplise y que les cuentes son irreales, polo que van tener que modificase práuticamente enantes de la so aprobación definitiva. Amás, consideren que ye xuegu xugáu, y que los recortes previstos pal añu qu’entra van agravar los yá aplicaos nel exerciciu actual, lo que namás va afondar na recesión y la destrucción d'emplegu, ensin llograr con ello algamar los oxetivos de déficit pautaos cola Xunión Europea.

La recentralización política y los recortes nes tresferencies tamién se contaron ente les crítiques repitíes por tolos grupos a lo llargo d'estes dos xornaes, mentes les que se reclamó de forma insistente una reforma fiscal y una llucha más decidida contra'l fraude. Por contra, el Gobiernu argumenta que los Presupuestos recueyen el mayor gastu social de la democracia y que van cumplise, como les cuentes del 2012, que, na so opinión, yá marquen la senda de recuperación de la economía. Pa ello, lo primero ye recuperar la confianza, lo que pasa por blindar les cuentes públiques.

Éstes son les prioridaes que reflexen unes cuentes qu'inclúin un axuste de 13.000 millones d'euros que va destinase, casi na so totalidá, a financiar la partida destinada a pagar los intereses de la deuda, que s'alza en 10.000 millones, y les pensiones. L'oxetivu va ser, un añu más, algamar l'oxetivu de déficit del 3,8 por cientu pautáu con Bruxeles pal 2013. Tres el refugu de les enmiendes a la totalidá, los grupos parllamentarios tienen de plazu hasta les 14 hores del vienres pa presentar les sos enmiendes parciales, que se van analizar na Comisión de Presupuestos, xunto col proyeutu de llei del Gobiernu estatal, ente’l llunes y el martes.

 

Contador Estadistiques