Formientu presenta en Xixón el númberu 10 de la so revista lliteraria

La Sociedad Cultural Gijonesa va acoyer esti llunes la presentación del númberu 10 de la revista lliteraria d’autores mozos Formientu. Ésti ye’l primer exemplar asoleyáu tres la renovación xeneracional entamada pola espublización.
 
Los y les autores que participen nel décimu númberu de Formientu dende la so creación por Xareos! Xestión Cultural nel 2006 son Cristina Menéndez Martín (Mieres, 1984), Frantxu Melero (Avilés, 1987), Inaciu Galán y González (Xixón, 1986), Abel Aparicio González (Lleón, 1980), Alejandra Sirvent (Pravia, 1980), Fonsu Suárez Román (Xixón, 1991), Javier Cubero de Vicente (Xixón, 1986) y Vítor Suárez Piñero (Uviéu, 1986). A los poemes d’estos escritores hai que sumar tamién los rellatos de Suárez Piñero y Blanca Fernández Quintana (Bimenes, 1994), amás d'una crítica lliteraria de Denis Soria Fernández (Xixón, 1989).
 
L’actu de presentación del númberu 10 de la revista va celebrase güei na sede de la Sociedad Cultural Gijonesa, asitiada nel númberu 4 de la cai de Miranda, a partir de les 20 hores. Nél van intervenir Inaciu Galán, direutor de la revista, y miembros del conseyu de redaición de la revista, amás de los autores qu’apaecen nesti númberu, dando llectura a los sos testos. Los interesaos en facese cola revista van poder mercala tres esti eventu o na páxina web de Xareos! Xestión Cultural. D’igual forma, dende Formientu animen a los autores mozos de menos de 30 años con raigaños nel dominiu llingüísticu astur-lleonés a unviar los sos testos al conseyu de redaición de la espublización al traviés de la direición formientu@xareos.com.