Fonsu Mielgo, pioneru del combustible ecolóxico

Si falamos de Fonsu Mielgo, tolos llectores d'Asturies.com van pensar de secute nel grupu musical Llan de Cubel, pero ello ye que'l percusionista del grupu folk con más proyección fuera de les nuestres fronteres tien otru llau que'l públicu nun conoz. Químicu de carrera, Fonsu Mielgo ye ún de los promotores de Bionorte, la empresa que ta poniendo n'Asturies una de les primeres fábriques españoles de biodiesel, el combustible verde que sal de reciclar aceites de cocina y grases vexetales. Fonsu Mielgo faló con Asturies.com pa danos un adelantu sobre esti interesante proyectu.



¿Cómo surdió la iniciativa pa facer esta fábrica?



Bueno, esti ye un proyectu que yo tengo dende va tiempu, pero que nun pude sacar alantre hasta que s'interesó por ello la empresa d'inxeniería Isastur, sociu financieru qu'apurrió'l capital que faltaba y col que participo na empresa Bionorte, matriz de la fábrica qu'agora tamos construyendo y que contamos con tener funcionando pal añu qu'entra. La idea viénome viendo qu'otros países yá taben avanzando nesti terrén (en Francia yá ye obligatorio que'l 3% del diesel que se vienda seya d'orixe vexetal) y qu'amás n'Asturies y la nuestra redolada l'aceite vexetal yera un residuu altamente contaminante y que nun taba aprovechándose.

La verdá qu'al oyíu d'un profanu suena raro que l'aceite de freir pueda convertise en gasoil pal coche… ¿cómo ye posible tala cosa?



Bueno, esto ye una esplicación de químicu, pero'l procesu llámase "tresesterificación" que consiste, resumiéndolo muncho, en reaccionar metanol colos esteres del aceite pa sacar d'ello gasoil y glicerina.



¿y el productu que sal d'ello ye un combustible de bona calidá?



Ye incluso meyor que'l gasoleo mineral. D'una parte, la gran ventaya del biodiesel ye que pola naturaleza que tien, más oleosa que la del gasoil normal, va engrasanos meyor la parte alta del motor, un puntu críticu porque ye onde peor llega l'aceite, mientres que per otra parte tien un índiz de cetanu (l'equivalente en diesel al octanu de la gasolina) mui altu que fai d'ello un combustible con una esplosión mui llimpia y potente, polo que tamos énte un combustible de muncha meyor calidá. Con too ello resulta que tenemos al final un motor meyor engrasáu y que suena más suave, ensin el "tracatraca" normal del diesel.



D'otra manera, la gran ventaya ye, evidentemente, la mengua espectacular d'emisiones contaminantes. A min llámame l'atención que, nesti tiempu en que tol mundu se preocupa tanto pol fumu del tabacu, a naide nun-y llame l'atención que teamos respirando tol día hidrocarburos aromáticos de los coches, que son axentes carcinóxenos de primer orde. Nesti sentíu, el biodiesel elimina dafechu estos gases, polo que ganamos muncho en salú con ello. Esta ye la razón pola que les empreses d'autobuses municipales s'interesen tanto por pasase al biodiesel.



Volviendo a lo que ye Bionorte ¿en que fase de desarrollu ta agora mesmo'l proyectu?



Tardemos bastante en poder ponenos colo que ye talamente la obra de la fábrica, porque primero d'ello teníemos que sacar alantre tola cuestión burocrática, definir bien qué queríemos facer y ver onde asitiábemos la fábrica, qu'a la fin va tar na Cuenca'l Nalón, anque en tou esti tiempu hebo xente que nos garró la delantera, y agora esiste yá una fábrica de Biodiesel en Cataluña y otra n'Euskadi, colo que vamos ser los terceros del estáu. Tamién yera importante afitar la rede de recoyida de materia prima, que nun ye otro qu'aceite vexetal usao, cosa que tamos faciendo al traviés de la empresa "Pumariega" que yá tien firmaos convenios con conceyos y asociaciones d'hostelería pa recoyer aceite usao per prácticamente tolo que ye'l terciu norte de la península, anque tamién lo recibimos de Canarias pel Puertu d'Avilés

¿Cuándo vamos poder cargar biodiesel en coche?



Va tardar unos mesucos entovía, anque tengo que dicir que de mano va haber pocos puntos de venta pa turismos particulares. La nuestra fábrica va tener una producción pequeña y lo más d'ello va ser pa flotes cautives de tresportes públicos, porque son clientes estables en tolos sentíos: gasten un volume de gasoil X, colo que yá sabemos cuanto van necesitar, carguen toos nel mesmu sitiu y podemos facer meyor un siguimientu de cómo funciona'l productu. Con too y con ello, tenemos unes siete gasolineres independientes n'Asturies que tamién tienen interés en distribuyir biodiesel.