Fomentu sigue ensin dar feches p’acabar el tramu Unquera-Llanes

El Ministeriu de Fomentu evitó dar plazu algún pa la conclusión de les obres de l'A-8 ente Unquera y Llanes, tramu qu'une Asturies con Cantabria, tanto pal tramu Pendueles-Llanes, como pal tramu Unquera-Pendueles.

Asina consta en dos respuestes parlamentaries de Fomentu a preguntes realizaes en septiembre pol diputáu d'IU, Gaspar Llamazares, quien s'interesó polos plazos. "Tovía nun puen establecese feches d'acabación de les obres hasta que s'analice dafechu'l procesu de reaxuste de les añalidaes de los contratos", señala Fomentu nes sos respuestes.
  
Nos dos escritos, fechaos el 12 y 14 d'avientu, el Gobiernu señala que l'actual situación de crisis y la necesaria reducción del déficit públicu conlleven que'l Ministeriu de Fomentu tenga que tratar "inevitablemente un axuste presupuestariu", algo que "obliga a replantegar tol so programa d'inversión pública pa los próximos cuatro años".
  
Añade que se ta desarrollando'l procesu de "reprogramación" de les actuaciones de la Dirección Xeneral de Carreteres, que "conlleva la prollongación de los plazos en delles actuaciones".
  
Nel casu de la respuesta relativa al Unquera-Pendueles, diz que l'axuste presupuestariu "supón que'l Ministeriu de Fomentu y les empreses del so grupu van ver reducíos los sos recursos presupuestarios, lo que va baxar de forma inmediata la capacidá d'inversión prevista nel 2010 y nos años siguientes, hasta algamar l'equilibriu presupuestariu nel 2013".