Fomentu aporfia por una segunda autovía cola meseta

El Ministeriu de Fomentu dio a conocer les traces xenerales del Plan d'Infraestructures Terrestres del Estáu (PEIT) un documentu que na so redacción definitiva caltién toles sos propuestes orixinales y que nun amiesta nenguna de les reclamaciones que se fexeron dende Asturies. Con too y con ello, el Gobiernu asturianu, al traviés de la Conseyería de Presidencia, emitió ayeri un comunicáu en que se congraciaba oficialmente énte lo que supón "una inversión superior a los 7.000 millones d'euros p'Asturies y afita les grandes infraestructures de comunicaciones que demandaba la nuestra Comunidá"

Ello ye que, contra la propuesta de Fomentu, agora cuayada yá formalmente, de facer una segunda autovía paralela a la del Val.le Güerna, de conexón cola meseta, el Gobiernu asturianu pidió a Fomentu que se rescatare'l portalgu de l'autovía actual.
Espurrir l'autovía Uviéu-La Espina pa contra'l suroccidente aprovechando la esistencia del futuru Túnel del Rañadoiru, meyorar la capacidá de la carretera nacional N-634 ente Lieres y Lloviu, y la creación de lo que se denominó "carretera verde" ente Cangues d'Onís y Lleón per El Pontón yeren les otres alegaciones d'importancia que se plantegaron dende Asturies y que quedaron ensin rempuesta.


Ello nun quitó pa que, en conociéndose la redacción d'esti plan pol qu'han mandase les infraestructures de tresporte terrestre del estáu d'equí al 2020, el Gobiernu asturianu declarare'l so contentu. Según Presidencia, el PEIT amiesta "racionalidá y perspectiva al desarrollu territorial a nivel estatal, contemplando una España radial y acordies colos oxetivos de la cohexón territorial". Pal Gobiernu asturianu la propuesta d'una segunda autovía pel Val.le Güerna, que refugaren de mano'l Principáu y les federaciones socialistes d'un y otru llau del cordal, concueya agora con "un apueste pol desarrollu sostenible"

Pal executivu asturianu, ye de sorrayar que'l PEIT acuta'l 50% de los sos recursos al ferrocarril, mientres que no tocante a Asturies, el Gobierno autonómicu quier facer públicu'l so contentu por un plan "qu'afita les grandes infraestructures poles que se vieno trabayando estos años" y que "respuende exactamente a les aspiraciones colectives de la ciudadanía". El Gobiernu asturianu cita la "Autovía dos Mares" una infraestructura que nun va pasar per Asturies pero que va conectar el Mediterráneu col Cantábricu como un proyectu clave. L'acabación del tramu Unquera-Llanes de l'autovía del Cantábricu y del tramu occidental d'esta autovía xunta les de la d'Uviéu-La Espina o la meyora d'otres carreteres como la de El Pontón son otres midíes poles que se felicita'l Gobiernu asturianu, neto que pol ferrocarril d'altes prestaciones ente Lleón y Xixón y el del Cantábricu.


No tocante al portalgu del Güerna, l'executivu asturianu interpreta la situación como "heredada del anterior Gobiernu del PP, qu'aumentó de forma inxustificada'l portalgu hasta l'añu 2050 y que privatizó la Empresa Nacional d'Autopistes". Con too y con ello, dende Asturies cuenten con que siga la negociación y l'estudiu de la cuestión pa da-y una salida a esta situación.
Entrar a la web del PEIT