Fomentu abre esti xueves dos tramos nuevos de la 'Y' de Bimenes

Los conductores asturianos podrán percorrer dende la tarde d’esti xueves 10,7 quilómetros de los 20,5 de la nomada ‘Y’ de Bimenes. Fomentu abre’l segundu y tercer tramu, que xunen L’Entregu cola población sierense de Solvay.

Esta vía rápida financiada na mayor parte con fondos mineros, que provocó un gran malestar vecinal y la oposición de coleutivos ecoloxistes, tenía hasta la fecha abiertu’l tramu que va dende Pumarabín al Altu El Corvero. El qu’entra en serviciu esta tarde, a partir de les 17 hores, xune l’enllaz de L’Entregu col de Solvay y supondrá tamién la entrada en serviciu d’un ramal de 2.133 metros que coneuta’l troncu de la carretera con Martimporra, la capital de Bimenes.

Les obres d’esta carretera de titularidá nacional, qu’acumulen un sobrecoste importante, principiaron hai ocho años, quedando tovía por terminar dos de los cinco tramos proyeutaos. La previsión del Gobiernu ye qu’esta vía rápida que xunirá’l corredor del Nalón y l’Autovía del Cantábricu tea finada a últimos d’esti añu.