Folk escoyío nel ciclu "Música del sieglu XX"

Música en directo y a techo ye lo que manda nesta época, equí damos anuncia de trés propuestes pa güei y mañana.

En Xixón güei tenemos folk y rockabilly nel menú. Quien trai'l folk esta vegada va ser Caxastur nel so ciclu "Música del XX". L'invitáu ye'l curdionista Peter Browne que va actuar a les güei a les 20:00 hores na Colexata San Juan Bautista de Xixón. Esti músicu dio los sos primeros pasos al rodiu de la música tradicional irlandesa pa depués interesase por otros estilos como'l jazz, bebop, pasando pela llibre improvisación o'l tangu. Güei Peter va tener un acompañante de luxu, Shane McGowan, el que fuera'l cantante y compositor de la mítica banda "The Pogues", va tar xunta'l curdión de Peter Browne.

Algo más tarde, a eso de les 21:30 hores nel café Trisquel va toca-y al rockabilly con "Nenuco y los prenatales". Esti orixinal nome escuende a una banda de perbona calidá lliderada por un de los meyores guitarristes d'Asturies nel so estilu, Rafa Kas.

Al día siguiente la cita cola música en directo ye n'Avilés. Ellí Ivan Drever y Duncan Chisholm van tocar nel Centru municipal d'Arte y Esposiciones a les 20:00 hores. Esti dúu xunta a dos mayestros de la música escocesa, Ivan Drever, ún de los cantautores folk de mayor prestixu y talentu que lleva la so voz personal, rota y señaldosa, acompañada de la so guitarra. L'antiguu llider de "Wolfstone" va acompañáu por Duncan Chisholm, consideráu como unu de los meyores vigulineros escoceses de l'actualidá.