Folk de cámara

El Muséu Casa Natal de Xovellanos de Xixón va ser l'escenariu esti mes d'un festival de folk bien distintu a lo que tamos avezaos a ver. Nada de nueches folk en prau con botelles de sidra nin bateríes d'amplificadores aturullando los oyíos. Esti mes, el meyor folk va ser "folk de Cámara"
como s'entitula'l programa de conciertos que va axuntar a dellos de los meyores músicos de folk del país nun certame que quier dar a conocer la estaya "más íntima" de la música popular asturiana nun escenariu tan recoyíu como ye'l del patiu del Muséu Casa natal de Xovellanos.

Diego Pangua, Dolfu R. Fernández y Rubén Bada entamen el viernes día 14 de payares a les siete y media de la tarde, un programa de conciertos que va durar hasta'l 5 d'avientu cola presencia ente otros de 'Llan de Cubel', 'Felpeyu', 'N"Arba', 'Xéliba', 'Bron', 'Gatos del Fornu', 'Llangres' o 'La Bandina"l Tombu'. Nesta sección daremos pronto'l calandariu completu d'actuaciones

El ciclu ye una iniciativa de l'asociación Juventudes Musicales, que quier col festival "ufiertar música tradicional asturiana nun formato asemeyáu al de la música de cámara, ello ye, conxuntos pequeños de dúos, tríos o cuartetos en sales recoyíes y ensin amplificación".

La entrada a los conciertos va ser de baldre, pero val más llegar a la hora porque nel patiu del muséu tampoco nun cabe muncha xente