Folixa en Mieres

Güei arranca una nueva edición de la "Folixa na
Primavera" en Mieres, actividá que yá ye una de les
más cites más importantes del almanaque de conciertos de folk y
música tradicional d'Asturies.



Toa una selmana d'actividaes ye lo qu'ufierta la "Folixa na
Primavera", eventu organizáu pol
Conceyu de Mieres qu'esti añu
decidió aumentar la partida presupuestaría destinada a esta
"Folixa". Gracies al apueste del Conceyu vamos tener una selmana
enllena de teatru, esposiciones, charres, y muncha música.



Güei llunes a les 20:30 inagúrase una esposición na
Casa de Cultura de Mieres sobre mitoloxía asturiana con una conferencia
de Servando Fernández. Del martes al xueves va desarrollase nel mesmu
llugar un ciclu de teatru n'asturianu , toles obres van entamar a eso de les
20:00 hores. Pal vienres hai toa una riestra d'actividaes dende primer hora de
la tarde hasta bien entrada la nueche. A les 16:45 hai'l Primer Troféu
de Gaita "Folixa na Primavera" nel centru cultural de Caxastur, que
ta na cai Jerónimo Ibrán,lo mesmo que la Casa de Cultura, y
depués, nel parque Xovellanos, vamos tener pasucais, actuaciones de
grupos de bailles como "Xorrecer" o bandes de gaites casu de
"Villa de Mieres". Nesa tarde
tamién va entregáse el "III Distintivu a la
Investigación Folclórica" "Fini Suárez"
qu'esti añu va pa Fernando Ornosa.



A eso de les 22:30 entamen los conciertos, que son el platu fuerte del
programa. El vienres van actuar "Gaiteiros de Lisboa"
banda mui recomendable con un soníu que que va sorprender al
públicu pol so característicu estilu, y darréu de los
portugueses va tocar Xose Manuel
Budiño, conocíu gaiteru gallegu que xunta al soníu de
la gaita gallega el de la uillean pipe, los whistles o les programaciones.



El sábadu 12 les actividaes entamen ya pela mañana sobre
les 11:30 con actuaciones de grupos de baille, espicha de pipes de sidra y un
conciertu de la Banda de Música de Mieres. Pela tarde a les 17:00 y nel
parque Xovellanos, va haber xuegos tradicionales a cargu de l'asociación
cultural "Retueyu", amás d'actuaciones de teatru na cai,
grupos de baille, banda de gaites, un festival de tonada y músicos de la
escuela de música tradicional de Mieres que van animar l'ambiente nes
cais de la villa. A les 22:30 vuelven los conciertos nel escenariu del parque
Xovellanos con "Felpeyu",
recién vueltos de la so xira trunfal per Australia y con discu nuevu
embaxo'l brazu. La nueva creación de los Felpeyu entitúlase
"¡Yá!" y va tar a la venta n'Asturies d'equí a la
vuelta de pocos díes. Depués de los asturianos llega la
música escocesa de los
"Tannahill
Weavers", grupu de sobra conocíu polos aficionaos al folk, y
que lleva tiempu exerciendo influyencia na nuestra música amás de
contar col tratu personal que tienen con munchos músicos asturianos.



El domingu siguen les actividaes con bandes de gaites, baille, espicha
de sidra, teatru y deportes tradicionales ente otres, rematando una selmana, y
sobre too un fin de selmana, que nun da descansu y que dende equí
recomendamos.