Flook, estrella nos alcuentros de Trebolgu

L'Asociación Trebolgu entama la quinta edición de los "Alcuentros Tradicionales". La gran cita uvieina del folk, na que rescampla la presencia de "Flook" desarróllase nel Parque l'Oeste.

Cuatro grupos asturianos, ún escocés y otru irlandés tomarán parte nesta edición, qu'entamó ayeri xueves presentación oficial en hotel La Gruta col conciertu-presentación del nuevu discu de la Bandina'l Tombo. D'otra manera, na presentación contóse cola presencia d'una delegación del III "Festival de las Músicas y de las Culturas del Cantábrico" de Mendebala (Sopuerta-Bizkaia) que pretenden presentar y promocionar esta iniciativa que se desarrolla nel país vascu.

El vienres la primer nueche folk entama a les 22.30 con Tuenda (Asturies), saliendo al escenariu darréu d'ellos los "Gatos del Fornu" que van dexar l'ambiente en condiciones pa l'apaición estelar de Flook. La banda anglo-irlandesa, na que les xiblates de Brian Finnegan y Sarah Allen faen un papel indiscutible que los estrema de tolo que'l públicu asturianu tamos avezaos a ver, firmó l'otru día una actuación sobresaliente na nueche de San Xuan de Llugones, meyorando, con muncho, tolo que s'esperaba d'ellos, lo que fai de la so actuación d'esta nueche una cita imprescindible en cuantes que ye l'últimu conciertu que dean anguaño n'Asturies.

El sábadu 26 hai animación tol día cola celebración del "Mercáu d'antañu" dende les 12 de la mañana con puestos de artesanos, malabaristes, una exhibición de deporte rural y un cuentacuentos, mientes que l'animación musical van facela bandines tradicionales y el grupu de baille Los Campones, d'Hevia (Siero). A les 22,30 llega la segunda gran nueche folk, cola participación de Llangres (Asturies), Fred Morrison & Jamie McMenemy (Escocia) y Dixebra.