Flavio Rodríguez saca un métodu de gaita

El gaiteru Flavio Rodríguez ta acabantes d'espublizar con Trabe un métodu de gaita con 100 partitures.

"Cien Melodíes de gaita" ye precisamente'l títulu d'esti nuevu métodu que sal al mercáu. Esti llibru surde como complementu del métodu que saco'l mesmu gaiteru en cd-rom va añu y picu. Nesti llibru vamos topar les enseñances básiques pa entamar a tocar una gaita, como facer los notes y exercicios pa dir garrando soltura nes manes, amás d'un apartáu dedicáu la adornos na gaita asturiana. Seique la parte más interesante del métodu son eses cien melodíes, que van dende los sones más cenciellos hasta los temes más complicaos del repertoriu de gaita asturiana. Amás estes partitures nun se queden solo nos cantares tradicionales, si non que tamién podemos ver dalgunes composiciones del propiu autor del llibru, de famosos gaiteros asturianos, o partitures de pieces de grupos folk como "Llan de Cubel", "Lliberdón" , "Felpeyu" o "N'arba". En pocos díes vais poder mecar esti nuevu métodu de gaita na nuesa tienda n'internet, Asturshop.com.