Flamenco-Pop y folk nel foru solidariu

La guitarra de Raimundo Amador, el curdión de Kepa Junkera y los sones asturianos de "Llan de Cubel" van pesllar la selmana solidaria entamada pola Axencia de Cooperación del Principáu.

La cita va ser el próximu diecisiete d'avientu n'Avilés, y la sida pa ello ye'l poné-y un pieslle festivu a unes xornaes que van llevar el nome de "Foru Solidariu", que como yá diz el nome van tratar sobre los distintos aspectos de la solidaridá. A lo llargo de la selmana, charres y conferencies van llevar hasta Avilés a xente de llugares tan llonxanos como'l Brasil o Guatemala pa contar les sos esperiencies. El final de les xornaes va celebrase con un conciertu onde van xuntase trés formes, más paecíes de lo que pue pensase de mano, d'entender la música con raigañu. Raimundo Amador vuelve a tierres asturianes depués de visitanos va poco en Llanes al Cubo, Kepa Junkera vien col so últimu trabayu "K" qu'inda nun pudimos ver n'Asturies, y p'acabar los de casa, "Llan de Cubel", que tan trabayando pa ser quien a sacar el nuevu discu pa la primavera. La entrada pal conciertu va ser de baldre, pero va haber que retirar enantes una invitación pa tener controláu l'aforu.