Finó'l rector Alberto Marcos Vallaure

Foi'l primeru que resultó escoyíu democráticamente na Universidá d'Uviéu.

Alberto Marcos Vallaure finó ayeri n'Uviéu a los 78 años. El caderalgu de Xeodinámica y primer decanu de la Facultá Xeoloxía, hermanu del ex conseyeru de Cultura y Deporte con Foro, Emilio Marcos Vallaure, yera natural de Cayés y una persona clave na modernización de la institución.

Ocupó'l cargu de rector ente los años 1983 y 1988 depués de ganar les primeres eleiciones al anterior, Teodoro López-Cuesta. Nel so mandatu afrontó la gran reforma de la enseñanza universitaria.

El rector actual, Ignacio Villaverde, calificó a Marcos Vallaure de universitaru "exemplar" que foi "referencia indiscutible de lideralgu y cercanía". "Él asumió los cambios trescendentales que tuvo que facer la universidá asturiana llueu de la entrada en vigor de la LRU. La so muerte dexa un vacíu enorme que namái pue enllenar el recuerdu de la so talla humana y académica", rescampló.

El ritu exequial de despidida del xeólogu va tener llugar esta tarde a les 17.45 hores na capiella del tanatoriu Los Arenales, n'Uviéu, onde descansa na sala 6.