Finó l'actor y autor teatral Arsenio González

|
Arsenio González Álvarez cola Compañía Asturiana de Comedias recoyendo l'Urogallo

Foi una de les persones que recuperó nel 1986 la Compañía Asturiana de Comedias.

Ayeri, a los 86 años d'edá, dexónos Arsenio González Álvarez, persona mui popular pol so llabor como actor y autor dientro del nomáu teatru costumista. Na so trayeutoria profesional destaca la recuperación, xunto a la so muyer Josefina García y Eladio Sánchez, Pili Ibaseta y José Fuertes, de la yá centenaria Compañía Asturiana de Comedias, el grupu teatral más antiguu del país.

Creada nel 1915, la Compañía Asturiana de Comedias tuvo una primer etapa con un esplendor especial nes décades de los 40 y los 50, llevando pel tol mundu les obres de creadores asturianos como Pachín de Melás, Manuel Llaneza o Agustín de la Villa, ente otros munchos. Tres una época na que vivió años malos, nel 86 comienza una segunda etapa na que recupera'l so puestu cabezaleru dientro la escena asturiana.

Amás de teatru, González Álvarez tamién tuvo participación en películes rodaes n'asturianu, como 'Xicu'l toperu' (1994), de Gonzalo Tapia; 'La neña los mios güeyos' (1999), de Carlos Navarro; '7337' (2000), de Sergio Sánchez; o 'Puntu' (2009), d'Eva Gallego. "Una gran perda personal, polo bon paisanu que yera, y p'Asturies, pola so aportación a la escena y a la difusión del asturianu y la cultura asturiana col so trabayu inmensu dende los escenarios y nel teatru asturianu", recordó ayeri tres conocer la noticia Inaciu Galán, presidente d'Iniciativa pol Asturianu, qu'apunta que "el meyor homenaxe ye siguir el so llabor".

El funeral pol actor xixonés va tener llugar esta tarde, a les 17 hores, na capiella del Tanatoriu de Xixón. Dende Asturies.com llamentamos esta perda y queremos mandar un fuerte abrazu tanto a familiares como a amigos y compañeros del mundu del teatru asturianu.

Na semeya, González Álvarez –de pie, terceru pela derecha– xunto a los sos compañeros de la Compañía Asturiana de Comedias tres recoyer n'agostu un 'Urogallo' especial con mención honorífica del Centro Asturiano de Madrid.

 

Contador Estadistiques