Finó la edición d'anguaño del Intercélticu de Lorient

Dempués de diez díes al rodiu de la cultura de los
países atlánticos, queda ver namás que ye lo que nos
dexó esti añu'l Festival Intercélticu más
importante del mundu, nel que la representación asturiana collechó dellos bonos resultaos y otros más discretos.



Como nun podía ser d'otra manera, la delegación asturiana
quedó a gustu cola so participación. "Gatos del Fornu"
gustáron-yos muncho al públicu bretón nes sos actuaciones, y la
"Banda de Gaites de Candás" tamién recibió'l
preste del públicu amás de quedar quintos (d'ocho bandes que participaben) nel
concursu de percusión de bandes .

En cuantes a "Kelthiké" la obra sinfónica de Ramón Prada que s'estrenaba nesti festival, nun
defraudó a los sos siguidores. Esta conxunción de la música de
países de cultura céltico suponía un difícil exerciciu de
composición, y tamién d'execución, lo que se notó n'actuación, na que s'evidenció que la orquesta necesitaba más
ensayos pa presentar la obra.

El mayor trunfu d'Asturies foi pal gaiteru Angel Domingo, que ganó'l Mac
Crimmon, quedando Iñaki Sánchez y el gallegu Alvaro Costas
compartiendo'l tercer llugar y Marco Antonio Guardado y Jorge Suárez
compartiendo tamién el quintu puestu. Pela so parte, el grupu de baille "Esbardu" tuvo bien
d'ocasiones p'amosar la los bailles asturianos per tierres bretones, de la
mesma manera que "Muyeres" que tuvo una interpretación
brillante na obra de Ramón Prada.

Los grupos asturianos participantes nel concursu de
grupos folk nun tuvieron tanta suerte. "DRD" Y
"Deua Dubra" nun pudieron pasar de la primer eliminatoria. Ello yera más d'esperar nel casu de "Deua Dubra" que yera la primer vegada que tocaben nun festival d'estes característiques y que pasaron, con dignidá, una difícil preba nel escenariu central del Festival, pero sorprendió
más nel casu de "DRD" formación iguada por músicos con abonda esperiencia n'otres formaciones, que dempués d'un bon conciertu y
de conectar col públicu nel poco más d'un cuartu hora que-yos dio'l xuráu pa tocar, cayeron tamién nel
primer corte.



Con too y con ello esti Festival queda marcáu pol recorte de
presupuestu. Los malos resultaos nel festival del añu pasáu,
provocaos en parte pola afogante fola de calor, dexaron unes deldes que
ficieron qu'esti añu nun se pudieren contratar munchos de los espacios tradicionales d'esti festival, y el cartel de conciertos nun tuviera
los nomes d'años anteriores, repitiendo en munchos casos los mesmos grupos pero repartiéndolos
pelos distintos espacios. De toes maneres esti sigue siendo'l Festival más
importante y referente de tolos demás. Yá namás queda despidir esta edición del 2004 y contar con que l'añu qu'entra, que va tar
dedicáu a Irlanda, Asturies vuelva a dexar el
pabellón peraltu otra vuelta.