Finen el gaiteru O'Flynn y el físicu Hawking

Eminencies internacionales nos sos campos respeutivos, dambos pasaron per Asturies.

El gaiteru irlandés Liam O'Flynn morrió'l miércoles a los 72 años tres una llarga llucha contra'l cáncer. Foi ún de los fundadores del históricu grupu Planxty y destacó como ún de los meyores músicos traicionales del so país, tocando con importantes artistes como Sinéad O'Connor o Mark Knopfler. El de Chill llegó a actuar n'Asturies, en concreto nel añu 2009 nel Beltaine avilesín.

Esi mesmu día tamién perdía la vida Stephen Willian Hawking, físicu teóricu inglés de 76 años que trescendió más allá del so ámbitu de trabayu. Afeutáu por una eclerosis lateral amiotrófica, deteutada a los 21 años, que lu condenó a una silla de ruedes y a comunicase al traviés d'un ordenador, la enfermedá nun-y impidió desarrollar una gran carrera científica centrada nel estudiu del Universu, confirmándose tamién como un escelente divulgador de la ciencia gracies a los sos llibros 'A brief history of time: From the Big Bang to black holes' (1988) o 'A briefer history of time' (2005).

El científicu nacíu n'Oxford y formáu principalmente en Cambridge foi Premio Príncipe de Asturias de la Concordia nel añu 1989, momentu nel que visitó Asturies per primer vegada. Tornaría nel 2005 con motivu de los actos del ventenu quintu aniversariu de los gallardones, con parada tamién a Xixón, destacando nesti viaxe la so querencia al nuesu país, que-y recordaba a Inglaterra.