Finaos los trabayos nos espacios protexíos de Barayu y Frexulfe

Consistieron n’actuaciones de caltenimientu, reparación y señalización del llugar.

El direutor xeneral de Recursos Naturales, Manuel Calvo, visitó les obres que la Conseyería de Desarrollu Rural y Recursos Naturales acometió na Reserva Natural de Barayu y nel monumentu natural de la playa de Frexulfe, que supunxeron una inversión de 7.250 euros. Los trabayos realizáronse'l mes de xunu pasáu y consistieron, ente otros llabores, na eliminación manual de delles manches de plantes alóctones invasores y la roza de los caminos y siendes que dan accesu a la playa de Barayu dende los aparcamientos allugaos nes proximidaes de los pueblos de Vigu (Valdés) y Sabugu (Navia).

Tamién s'asitiaron finxos de piedra y postes señalizadores entemedios de les rutes d'accesu a la playa pa evitar perdes de los visitantes ensin familiarizar col percorríu. Amás, reparóse la barandiella en dellos tramos peligrosos y repúnxose la maroma que facilita la baxada al arenal al traviés del frente de la duna, que presenta una pendiente elevada. La llimpieza y reasentamientu de los paneles qu'informen sobre los valores de la reserva, baltaos poles envernaes, foi otra de les actuaciones.

Mentes, nel monumentu natural de la playa de Frexulfe instaláronse nuevos paneles informativos en formatu vinilu con datos relativos a esti espaciu protexíu.