Figaredo monta un espolín nel Congresu pol usu del gallegu

Una protesta suya obliga a suspender la Comisión d'Industria y Turismu.

Una intervención en gallegu de Néstor Rego, del BNG, acabó con José María Figaredo, diputáu de VOX por Asturies, montando un espolín qu'impidió la continuidá de la sesión d'ayeri cuando llevaba hora y media de duración. Entendía que'l d'O Vicedo, al nun solicitar la interpretación simultánea, nun podía utilizar esta llingua oficial: "Señora presidenta, ye que l'interviniente continúa en gallegu y l'alcuerdu de la Mesa nun lo permite", protestó.

Al nun tener la pallabra, la presidenta de la Comisión, Inés Granollers, d'ERC, llamólu al orde hasta en trés ocasiones, acabando por espulsalu de la sala y por suspender la sesión. Rego intervieno darréu apuntando que "creo recordar que l'alcuerdu de la Mesa diz que nun habiendo interpretación los diputaos y diputaes pueden optar por utilizar la llingua que consideren y autotraducise. Creo que taba en tiempu de facelo, pero polo visto'l señor Figaredo sabes más que tol mundu siempre, y amás ta decidíu a decidir, a mandar".

Depués d'estes pallabres, Granollers pretendía siguir cola sesión con Figaredo na sala, y dar pasu, al dar por finada Rego la de so, a Esher Gil de Reboleño, de Sumar, que señaló que "nun podemos continuar nestes circunstancies" al entender que "vusté, que ye la máxima autoridá equí, dixo que se suspende la sesión o esti señor abandona la sala". "Tomó una decisión y hai que cumplila", a lo que siguió un aconceyamientu de voceros a tomar una determín, que foi la suspensión de la comisión.