Fernando Lastra y Valledor emiten opiniones enfrentaes sobre la oficialidá

El Conseyeru de Xusticia Francisco Javier Valledor (IX) y el diputáu socialista Fernando Lastra foron oxetu esti fin de selmana d'entrevista nos periódicos asturianos de mayor tirada. Mientres Valledor-y dixo a La Nueva España que diba ser mui difícil qu'IX siguiere en gobiernu "ensin alcuerdu sobre la oficialidá" Fernando Lastra declaró n'El Comercio que la oficialidá ye "una idega que nun trunfa" y pidió-y a IX que l'aparcare.

Mientres el líder d'Izquierda Xunida aseguró nuna entrevista con José Luis Piñeiro pa La Nueva España que "diba ser mui difícil qu'IX siguiere en gobiernu ensin alcuerdu sobre la oficialidá" afitándose na so voluntá de que se faiga la reforma del estatutu nesta llexislatura, el voceru del Grupu Parlamentariu Socialista na Xunta Xeneral esplicó-y a José Ángel García n'El Comercio que la FSA nun cuenta con dir más lloñe de les actuales polítiques de promoción del asturianu y que, anque ta dimpuesta a negociar delles cuestiones qu'entiende "minoritaries" na reforma "el nuestru tope respective a la oficialidá yá se conoz". Entrugáu pola proposición non de llei na que'l PSOE defende la diversidá llingüística del estáu y les sos posibles repercusiones n'Asturies, Lastra afirma que nun ye contradictoria col casu asturianu en cuantes que "una cosa ye'l reconocimientu que tenemos de les llingües cooficiales nel Estáu y otru'l d'aquelles que nun lo son, y que yo sepa, l'asturianu nun ye oficial".