Fernando Alonso, terceru nos entrenos en Bélxica

Nos entrenos definitivos pal G.P. de Belxica que se cuerre mañana, el pilotu asturianu de Fórmula 1 tuvo nun tris de marcar la pole position, que foi pal otru Renault de Jarno Trulli.



Col agua como protagonista, los entrenos definitivos pa la carrera belga tuvieron estraos de sorpreses y demostraron por qué Spa ye ún de los circuitos más difíciles del calandariu. Ello ye que tolos favoritos, sacantes Jarno Trulli, cometieron fallos na so vuelta calificatoria. Fernando Alonso y Michael Schumacher, que ficieron el primer sector de la llarga pista belga con meyor tiempu que l'italianu de Renault, fallaron nel segundu parcial, los dos na mesma parte de curves enllazaes, mientres que'l segundu Ferrari, el de Rubens Barrichello, perdía la trazada bona na parte final de la chicane y cayía a la sesta posición cuando taba pa facer la pole. David Coulthard, que fizo'l cuartu meyor tiempu, tamién tuvo qu'aguantar los ximielgones del McLaren a l salida d'una curva.

Los resultaos de los entrenos, disputaos con muncha agua, nun esclarien lo que pueda pasar mañana nin tampoco dexen ver si sobre moyao van meyor les cubiertes Michelin de los Renault o les Bridgestone de los Ferrari, anque la carrera promete ser emocionante, sobremanera en casu de llover. Les condiciones atmosfériques de Les Ardenes son mui variables y ye facil que nuna esquina del circuitu llueva mientres n'otra pegue'l sol. Polo que cinca al pilotu asturianu, Alonso dixo que taba mui contentu del resultáu, sobremanera porque llevaba tiempu ensin rodar nel circuitu de Spa -au ganare va trés años na carrera de Fórmula 3.000- y porque los rivales directos de Renault nel campeonatu de marques, BAR-Honda, quedaren no fondo de la parrilla de salida y nun cuenten pa mañana.