Fernando Alonso remontó 13 puestos

El pilotu asturianu de Fórmula 1 protagonizó en Bahrein una carrera espectacular acabando en sesta posición dempués d'una remontada de 13 puestos.

Fernando Alonso llevó pal ermu nel que s'asitia'l circuitu de Bahrein la cigua cola que tuviere que correr en Malasia. Dempués d'unos entrenos discretos el vienres (novenu meyor tiempu) tol mundu contaba con qu'alonso destapare'l xeniu'l sábadu, pero un problema colos frenos del R24 torgó la meyor vuelta del asturianu, que namás pudo facer el 16º meyor tiempu, a cuatro segundos de Michael Schumacher, que fizo la tercer pole del añu cola bala encarnada.

Saliendo tan atrás, y amás pela parte puerca de la pista, nadie nun contaba con milagros, sobremanera cuando'l coche del asturianu perdía'l focicu nun toque col Jaguar de Klein y tenía d'entrar a poner otru nuevu. Al salir del box, Fernando Yá diba l'últimu y a 60 segundos de Schumacher. Lo que vieno darréu foi una remontada histórica, cerca del record de John Watson en 1983, cuando ganó con McLaren en Long Beach saliendo dende la plaza nº22 (daquella corríen 26 coches) Alonso entamó a llevar coches per delantre nuna riestra d'adelantamientos espectaculares y arriesgando al más arriesgar, sobremanera pa pasar al Sauber de Felipe Massa con un interior de llibru. A lo último, el Bar de Takuma Sato foi un güesu demasiao duru p'Alonso. El coche angloxaponés demostró en Bahrein que Renault yá nun ta sola na riestra d'outsiders que van tres de los Ferrari, y la potencia del motor Honda, a la espera d'una evolución nel Renault -que se prometió pa San Marino- marcó la diferencia nes rectes de Bahrein. Nes vueltes del final, el nipón y l'asturianu merendaron al colombianu Pablo Montoya, que diba perdiendo tiempu col cambiu esgonciáu, pa entrar quintu y sestu.