Fernando Alonso, rei del desiertu

Fernando Alonso pasó con nota la travesía del desiertu en Bahrein, un circuitu asitiáu en medio d'Arabia con temperatures ambiente de más de 40 graos y nel que mecániques, frenos y pilotos sufren enforma. El pilotu d'Uviéu marcó la pole position, avisando de que nun dibadexar que l'acabante estrenar Ferrari 2005 acabare col dominiu de Renault nesti entamu de temporada, y ellofoi asina dende la salida, na qu'Alonso,dempués de quedar igualáu na primer curva con Schumachery Trulli, entamó a garrar distancia hasta ponese a más de trés segundos del kaiser Schumacher. Sicasí, l'alemán nun diba dase a la primera, y Michael, posiblemente con menos gasolina cargada, entamó a recortar diferiencies col coche azul y mariellu d'Alonso. Tenía tola traza de dir a producise'l primer gran duelu ente los dos, pero cuando Schumacher tentó d'adelantar a Alonso, el coche del alemán esnidió y, anque foi a metese na pista otra vuelta, el Ferrari dio muestres de tar tocáu, mandándose'l campeón del mundu a los boxes, onde apagó'l motor.

Fernando Alonso entamó entós una carrera de les d'aburrir, ensin oposición na pista y rodando siempre en tiempos más rápidos que los demás coches. Atropando segundos de diferencia a cada vuelta, Alonso llegó a entrar y salir líder de boxes na segunda parada a cargar gasolina, permitiéndose'l luxu de doblar,a poco del final, al segundu Ferrari de Rubens Barrichello, que rodaba poco menos qu'al ralentín pa poder acabar la preba y sumar unos puntos. Cola exhibición d'Alonso, l'únicu rispiu d'emoción corrió al cargu de Pedro Martínez de la Rosa, pilotu suplente de McLaren Mercedes y qu'ayeri tuvo la oportunidá de correr gracies a la mancadura del titular del volante númberu 10, Juan Pablo Montoya. De la Rosa adelantó a trés coches en carrera y marcó la vuelta rápida del Gran Premiu, pero nun pudo pasar de la quinta plaza final. Jarno Trulli, ex-compañeru d'Alonso en Renault, demostró l'aguante del Toyota terminando en segunda plaza tres d'una carrera mui regular, mientres que Kimi Raikonen completó'l podiu confirmando que los Mclaren tan recuperándose del mal aniciu de temporada, anque lo mesmo ellos que los Williams-BMW tan un escalón perbaxo de Renault, l'equipu a superar a la espera de lo que pueda meyorar el Ferrari 2005.

San Marino ye'l siguiente Gran Premiu, y ellí Ferrari cuerre en casa.