Fernando Alonso raspió’l Caxón en China

El pilotu asturianu de Fórmula 1 acabó en cuarta posición una carrera difícil pa tolos pilotos na estrena del nuevu circuitu de Shangai.

Rubens Barrichello firmó otru trunfu pa Ferrari, escudería que lleva ganaes toles carreres del añu menos dos, pero bien cierto ye qu'esta vegada los coches encarnaos nun lo tuvieron tan fácil como n'otres ocasiones. Jenson Button col BAR-Honda y Kimi Raikonen col resucitáu Mclaren Mercedes diéron-y muncha guerra al brasileñu y entraron en meta pegaos a la culera del coche de Maranello. No tocante a Fernando Alonso, l'asturianu compensó coles manes lo que nun daba de sí un coche que ta en fase d'evolución, y ye que Renault estrenaba una versión nueva del R24 con menos pesu que l'anterior.

Alonso fizo una salida espectacular, pasando del sestu puestu en parriya a la tercer plaza, pero Renault diba a dos paraes en boxes en cuenta de trés, y Alonso tuvo qu'engarrase con un coche más cargáu de gasolina que los demás, polo que tuvo que ceder énte l'emburrie del motor Honda de Jenson Button.

D'ehí en p'alantre la carrera foi cómoda pal asturianu, que namás recibió dalgún ataque de Ralf Schumacher, vueltu a les carreres dempués d'un accidente. En cuantes al hermanu de Ralf, el campeonísimu Michael, poco hai que dicir. Schumacher salió l'últimu por culpa d'un problema técnicu y pasó un gran premiu estráu de problemes p'acabar na 12ª plaza, anque marcando la vuelta rápida en carrera.

El pilotu asturianu contó nes tribunes de la pista china con un garapiellu de cerca de trenta aficionaos asturianos que viaxaron hasta China, siendo l'únicu de tolos pilotos que tuvo peña propia nel acabante d'estrenar circuitu de China, el primer país que se declara comunista en recibir al deporte más capitalista.