Fernando Alonso, l’únicu al altor de Schumacher

La mayor picardía de Ferrari na estratexa de paraes en boxes quitó-y el trunfu al pilotu asturianu en Francia

Fernando Alonso dio-y ayeri un reblagu a la so temporada en Gran Premiu de Francia.

Dempués de facese cola pole position nuna sesión d'entrenos bien emocionante, l'asturianu confirmó ayeri na pista de Magny-Cours que ta dafechu recuperáu de la cigua que lu azotó estes carreres últimes. De mano, l'asturianu de Renault fizo una salida de libru y mandó la carrera per delantre de Schumacher, que foi l'únicu capaz d'aguanta-y el ritmu a Fernando Alonso. Dambos pilotos ficieron güecu ensin que'l coche encarnáu del campeón del mundu pudiere arrimar el focicu a los alerones del pilotu asturianu. En Ferrari decatáronse bien ceo de que la única posibilidá que teníen de neutralizar el peligru yera poniendo a Schumacher a facer un sprint trés d'otru.

Asina, l'alemán entamó una estratexa nunca vista hasta agora parando nada menos que cuatro vegaes nos boxes, lo que-y valió pa correr más sueltu llevando poca gasolina y y les cubiertes más fresques, ello aparte de que les Michelin que monta Renault tienen peor desgaste que les Bridgestone que calza Ferrari. La idea demostróse que valía y asina'l Ferrari pudo adelantar al Renault aprovechando una de les paraes en box, en cuantes que facelo en carrera abultaba imposible. Fernando Alonso quedó entós a ver el sprint del Ferrari y aguantó hasta'l final nun gran segundu puestu que ye la cuenta pa dase a valer elli y l'equipu.

Tres d'ellos entraron en meta'l Ferrari de Rubens barrichello, que-y arrampuñó la plaza nel últimu intre a Jarno Trulli, el BAR-Honda de la revelación Jenson Button y los dos Mc laren Mercedes, que polo menos yá son a acabar les carreres, mientres que pesllando la zona de puntos entró'l colombianu Montoya con un Williams-BMW n'hores baxes.