Fernando Alonso ganó cola suerte del campeón

Emocionante carrera la que se corrió ayeri nel infiernu verde de Nürburgring, el circuitu alemán escenariu de la sétima preba del mundial de Fórmula 1. En casa de los dos motoristes alemanes (BMW y Mercedes) Alonso consiguió un trunfu mui trabayáu que nun llegó hasta la última vuelta y pal que tuvo de forzar los fallos de tolos sos rivales.


Saliendo dende la sesta plaza, Alonso consiguió de mano sobreponese al barullu de la primer curva, nel que cayeron dellos ilustres como Schumacher. Sicasí, mientres per delantre'l Williams d'Heidfeld y el McLaren de Raikonnen escapaben vuelta tres vuelta, Alonso alcontró un tapón mui duru de pasar nel coche de David Coulthard, que-y peslló tolos güecos. Pa cuando pudo pasalu, Raikonnen taba n'otru mundu, a más distancia de la que paecía que se pudiere salvar. Sicasí, l'asturianu punxo'l Renault a tolo que daba y foi allegándose al coche del finlandés, que, viendo'l coche d'Alonso pelos espeyos, pasóse de frenada delles vegaes, lo que-y valió p'aplanar una cubierta de delantre. Al perder la goma la curvatura, Raikonen robló la so sentencia, y la rueda derecha d'alantre del coche del finlandés entamó a ximielgase cada vegada más fuerte.

Raikonen baxó'l pistón nes últimes vueltes, pero en viendo qu'Alonso se-y ponía a mui poca distancia, decidió da-y un apertón a la máquina. Foi abondo pa que, na frenada del final de la recta de tribunes, onde'l tresvase de masa del coche al exe delanteru ye más fuerte, la rueda que llevaba yá delles vueltes zapicando ficiere españar la suspensión. Raikonen salió derechu pa contra'l trito de la escapatoria y Alonso, que de cualquier manera taba en condiciones d'adelantar al finlandés na vuelta final, nun tuvo más que pañar les consecuencies del fallu del rival pa facese con un trunfu qu'enancha la so ventaya al frente del mundial hasta los 32 puntos sobre Kimi Raikonen, que pasó de tener los 10 puntos a negún. Segundu entró na meta l'alemán Nick Heidfeld con Williams BMW, confirmando la meyora d'estos coches, mientres que na tercer plaza llegó Barrichello col Ferrari. Schumacher namás pudo ser que quintu.