Fernando Alonso gana en Malasia

El pilotu asturianu de fórmula 1 ganó la carrera de Sepang y ye líder del mundial

Fernando Alonso ganó esta mañana'l Gran Premiu de Malasia de Fórmula 1 en circuitu de Sepang. Alonso, que salía col so Renault en primera posición de la parriya dempués de marcar los meyores tiempos nos entrenos, confirmó'l so papel de favoritu dominando la carrera dende l'entamu y marcando distancies grandes colos demás competidores, terminando la carrera en segunda posición a 24 segundos del asturianu, Toyota de Jarno Trulli y completando'l podium l'aleman Nick Heifeld con Williams. El gran campeón Michael Schumacher nun pudo pasar de la tercer plaza dempués d'una carrera gris, anque nun hai qu'escaecer que Ferrari ta corriendo col coche del 2004 adaptáu al reglamentu nuevu y va haber que tar sollertes a les posibilidaes del chásis nuevu, que va estrenase en Bahrein. Otramiente, el compañeru d'Alonso, Giancarlo Fisichella, abandonó la carrera dempués d'un toque col Williams de Mark Webber cuando lluchaben pola tercera plaza.

Con dominar la carrera ensin perder en nengún momentu'l primer puestu más que nes paraes en boxes, el pilotu asturianu tuvo de correr nunes condiciones durísimes al nun funcionar el sistema qu'apurre agua de beber al pilotu nel monoplaza azul y mariellu. Con más de cuarenta graos de temperatura ambiente, Alonso acabó deshidratáu el gran premiu, precisando d'asistencia médica al acabar el Gran Premiu. Si les condiciones físiques foron difíciles pa un trunfu que paeció tán fácil, la carrera del asturianu ganó más méritu al reconocer Fernando Alonso énte la prensa que nun forzó'l coche porque-y abultaba que nun diba reondu.

Ver tola información de la carrera na web oficial de la Fórmula 1 y na web de Fernando Alonso