Fernando Alonso estrenó’l coche pal 2005

El pilotu Fernando Alonso fizo ayeri en circuitu de Cheste (Valencia) la estrena del Renault R25, coche col que l'asturianu va correr esti añu la temporada de Fórmula 1. La casa francesa enfótase muncho nesti coche, del que cuenta con que tenga la estabilidá del R24 pero que resulte más afechiscu pa circuitos rápidos, terrén onde'l coche vieyu quedaba a muncha distancia de la competencia.

Na primer toma de contactu col coche los tiempos foron lo de menos, pero'l pilotu declaró alcontrase "mui bien" col monoplaza y dixo que-y tresmitía bones sensaciones, destacando lo amañoso del puestu de conducción y el tiru del motor, del que dixo qu'emburria muncho a poques revoluciones. El coche salió a pista dos vegaes completando 15 vueltes, anque l'equipu llamentó que'l fríu y l'aire que soplaben en Cheste torgaren una toma de contactu más .completa Con too y con ello, Alonso marcó un tiempu de 1,11,471, a namás mediu segundu del meyor de la xornada. Alonso fizo la estrena absoluta del coche, qu'entovía nun tocó nengún otru pilotu del equipu, y asina foi que Giancarlo Fisichella, compañeru d'Alonso en Renault, rodó 60 vueltes col vieyu R24 probando cubiertes

Per fuera, el coche nuevu estrémase del vieyu a la vista en dellos detalles ente los que llama l'atención la forma de los pontones, qu'agora van más torniaos y lleven unes rendixes sonsañando branquies de pexe pa la parte d'atrás.