Fernando Alonso esbarió nel aceite del so coche

Saliendo terceru na parriya, l'asturianu fizo otra de les salíes espectaculares a les que tien avezáu al públicu, mangándose na segunda posición tres del so compañeru Jarno Trulli, quien se vio bien pronto que yera un tapón al ritmu que podía poner l'asturianu. Aprovechando la entrada a cambiar cubiertes del so compañeru, Alonso quedó líder y, nuna vuelta, intentó saca-yos diferiencies a los demás pilotos, pero poco dempués de pasar la rampla del Radillon el coche del asturianu marchó nuna curva, dando una vuelta de pionza. Alonso recuperó'l volante, pero'l coche marchó otra vegada na siguiente curva, acabando empozáu nel sable de protección. La causa súpose dempués, y ello foi una avería nel motor, qu'empezó a soltar aceite chiscando directamente a la rueda d'atrás. El mesmu Alonso reconoció que, de nun ser por ello, pudiere ganar la carrera.

Ensin l'asturianu, la carrera siguió tan alloriante como al principiu. Paecía que los Ferrari diben tener un mal fin de selmana, yincluso Montoya adelantó a Schumacher nel requexu más difícil pa ello, pero los rivales de los coches encarnas diben quedando fuera de combate un tres d'otru. Jarno Trulli, que yera líder, volvió a la pista con un baxón de rendimientu y acabó fuera de los puntos, mientres que los dos Williams rompieron nel terciu final de la preba. Coulthard, col segundu Mclaren, arreventó una cubierta, lo mesmo que Jenson Button. Al final, namás entraron en meta la metada de los coches, pero kimi Raikonnen, que garro'l mandu tres de l'accidente d'Alonso, aguantó toles vueltes de la preba hasta firmar el primer trunfu del añu de los McLaren Mercedes. Sicasí, col segundu puestu, Schumacher afitaba matemáticamente'l so sétimu campeonatu del mundu.