Fernando Alonso, cuartu ensin cubiertes

Mónaco, el circuitu con mas glamour de la temporada, vio'l primer podiu del añu ensin la presencia de Fernando Alonso. El pilotu asturianu salía dende la segunda plaza, y anque'l McLaren Mercedes de Kimi Raikonen, qu'agora ye tamién el másimu oponente d'Alonso nel Mundial, salió disparáu tres del trunfu namás prendese'l semáforu verde, Alonso caltuvo n'arrancada una segunda plaza que valía muncho nes sos opciones al títulu.

La salida a la pista del coche de los xueces neutralizando'l tráficu por culpa d'un accidente axuntó a tolos coches, y Renault decidió entós facer una maniobra arriesgada mandando entrar a box a Alonso pa que cargare gasolina hasta'l tope y asina aguantar ensin volver a recargar les más de cuarenta vueltes que quedaben. La estratexa viose que yera mala yá de mano, y mientres Raikonen maraba vueltes rápides ensin tasa con un coche cada vegada más sueltu, el Renault d'Alonso comportábase como un camión cargáu. Pa más aquello, Renault llevaba la goma más blanda de Michelin nes cubiertes, y esta diba consumiéndose baxo'l pesu del coche cargáu más apriesa de lo normal. Mientres Raikkonen s'escapaba per delantre, Alonso malamente yera a tenese en pista, y sentía tres d'elli'l ruiu de los Williams BMW de Webber y Heidfeld. Alonso zarró-yos la puerta mientres pudo, pero'l Renault del asturianu yera'l coche mas lentu na pista monegasca, rodando hasta 7-8 segundos más despacio que los demás, llegando'l momentu inevitable en que los dos Williams pasaron al coche azul y mariellu na frenada de la piscina, un llugar onde los bólidos pasen de 230 kilómetros hora a unos 60 en cuestión de cien metros y nel que los coches blancos y azules pasaron al Renault, que yá nun tenía goma nes ruedes, en dos vueltes consecutives.

Alonso quedaba asina cuartu, pero tres d'elli venía un segundu pelotón col segundu McLaren de Montoya, el Toyota del pequeñu de los hermanos Schumacher y los dos Ferrari de Barrichello y Schumacher. Alonso, coles cubiertes pelaes, aguantó a lo llargo de siete vueltes interminables los ataques d'esti grupu, calteniendo a la fin la cuarta plaza que-y daba cinco puntos d'oru nel campeonatu, nel que ye lider con 22 puntos sobre Raikonen. L'equipu francés nun va tener tiempu de reaccionar énte la superioridá de McLaren Mercedes, y ye que la siguiente carrera va ser n'Alemaña d'equí n'ocho díes.