Fernando Alonso amarró la cuarta plaza nel mundial

Corriendo a aguantar, con una estratexa menos paraes a cargar gasolina que los demás corredores, Fernando Alonso arriesgó cola decisión de les cubiertes, montando les de seco cuando taba acabante de caer un bastiazu nel circuitu brasileñu. Cola pista moyada, Alonso esnidió nuna curva y cuando recuperó ocupaba la plaza 17, pero, según la pista foi secando, l'asturianu entamó un ascensu que lu llevó a liderar la carrera… en namás 7 vueltes.

Ello foi más ficción qu'otra cosa, lo que pasaba yera que tolos demás pilotos tuvieron d'entrar a calzar cubiertes de seco, pero en cuantes la carrera aposentó, viose que Williams, McLaren y Ferrari pasen con muncho al coche del asturianu, al que dexaron atrás ensin mayor problema los que diben xubir al podiu. El primeru Pablo Montoya, rival d'Alonso pola cuarta plaza del mundial, qu'iguó la mala campaña del equipu ganando la carrera, pero los 10 puntos del trunfu nun foron abondos pa pasar a Alonso na xeneral del mundial. El McLaren de Raikonnen y el Ferrari de Barrichello, que salvó los trastes del equipu italianu nuna mala carrera de Schumacher, tamién pasaron al asturianu, que terminó cuartu aguantando los ataques del otru Williams de Ralf Schumacher y del nipón Takuma Sato.