Fernando Alonso, al altor de los Ferrari

Col circuitu de Montmeló estráu de banderes asturianes, Fernando Alonso remató un fin de selmana perfectu en que demostró que, con munchos caballos menos, pue tar a l'altor de la poderosa Scudería Ferrari. El vienres Fernando facía'l décimu meyor tiempu, un cronu que nun dicía muncho de les posibilidaes del pilotu de Renault, pero yá avisaba de que'l tiempu podía baxase abondo. Y asina foi el sábadu, en que l'asturianu firmaba'l tercer meyor tiempu, primer pilotu tres de los inalcanzables y espectaculares Ferrari f2003ga de Schumacher y Barrichello. El compañeru d'Alonso, l'italianu Jarno Trulli confirmaba'l bon momentu de los coches franceses faciendo'l cuartu tiempu nunos entrenos que pintaron mal pa los McLaren Mercedes. Mientres que Coulthard nun pasaba d'una posición discreta, Raikkonen salíase de la pista y tenía qu'arrancar el
domingu dende atrás del too al nun tener un tiempu que-y valiera pa clasificase.



Yá de los datos de los entrenos sabíase que los Ferrari teníen 18 km/h más de punta de velocidá que los Renault, pero'l domingu a les dos de la tarde y con media Asturies pendiente de la TV, Alonso facía una arrancada de llibru y yera quien a esmucir un intre'l coche azul y mariellu ente los dos bólidos encarnaos. Yera'l primer avisu de lo que diba ser una llucha ente'l segundu de los Ferrari y el pilotu carbayón, qu'acabó repasando al brasileñu pa terminar en segunda posición a namás siete segundos del kaiser Schumacher na llinia de meta depués de hora y tres cuartos d'emocionante carrera en que los de Renaul ficieron una bona estratexa de paraes en boxes que tamiénm ayudó pa un resultáu históricu, el meyor d'Alonso y énte la xente de casa. El pentacampeón alemán yá tien quien lu sostituya, y asina lo reconoció na rueda de prensa depués de la carrera, lo mesmo que la prensa internacional, onde l'asturianu tien güei más protagonismu que'l ganador