Fernández Castañón visita'l llar de l'ALLA

|
Xosé Ramón Iglesias Cueva, Xosé Antón González Riaño, Sofía Fernández Castañón y Alba González Sanz

L'alcuentru col presidente Xosé Antón González Riaño allargóse per más d'una hora.

Sofía Fernández Castañón fixo esta mañana la so primer visita institucional al llar social de l'Academia de la Llingua Asturiana (ALLA) como coordinadora de Podemos Asturies. Na mesma tuvo acompañada por Alba González Sanz, secretaria dOrganización de la formación morada, mentes qu'a González Riaño acompañólu Xosé Ramón Iglesias Cueva, secretariu de la institución.

Los representantes de l’ALLA treslladaron a les dirixentes polítiques les llinies de trabayu que vien llevando alantre la institución, asina como les necesidaes que, dende una perspeutiva funcional, se consideren más trescendentes pal normal desarrollu de les sos funciones. Pela so parte, Castañón espunxo a los académicos los exes básicos de la política llingüística que Podemos defende pa contribuyir a la dignificación de les llingües d’Asturies, sorrayando la importancia del llogru de la oficialidá, acordies col mandáu constitucional del artículu 3.2.

La reforma del Estatutu pa incluyir la oficialidá salió a alderique, tratando'l procesu siguíu nes conversaciones y les dificultaes atopaes. L’ALLA y Podemos apautaron, finalmente, siguir calteniendo conversaciones col envís d’intercambiar idees y posiciones en rellación coles dinámiques de negociación estatutaria que, nel so casu, se pudieren dar ente les fuerces polítiques a curtiu y mediu plazu n’Asturies.

Na semeya, Iglesias Cueva, González Riaño, Fernández Castañón y González Sanz.

Contador Estadistiques