Fernández Castañón dimite como coordinadora autonómica de Podemos

Un equipu téunicu va tar al frente del partíu hasta l'entamu d'una Asamblea Ciudadana.

Sofía Fernández Castañón comunicó esta mañana la so decisión de dimitir como coordinadora autonómica de Podemos y de tolos sos cargos a nivel estatal. Yera secretaria de Cultura, miembru del Secretariáu y del Conseyu Ciudadanu.

"Zarro esta etapa deseando'l meyor rumbu d'equí p'alantre a esta organización que siguimos necesitando más si cabe. Cada militante de Podemos Asturies nun merez menos", apunta nun comunicáu nel que tien bones pallabres pa les sos compañeres del Conseyu de Coordinación de Podemos Asturies que "tuvieron al frente, teniendo amás qu'encabezar procesos municipales, autonómicos y unes decisives eleiciones xenerales", citando de manera espresa al coordinador autonómicu interín Rafael Palacios, a Olaya Suárez y a Alba González Sanz. De baxa por motivos de salú dende xineru, esplica que "vuelvo al mio trabayu y a dedica-y a la mio familia'l tiempu que nestos años el mio compromisu-yos (nos) furtó".

Llueu d'esta decisión de la xixonesa va quedar al frente del partíu un equipu téunicu designáu pol Conseyu de Coordinación Estatal, que va tar formáu por Palacios, Álex Zapico, Eva Fernández, Diego Ruiz de la Peña, Esmeralda Palacio, Ignacio Loy, Ramón Martínez, Lorena Lastra, Nora Isabel Espina, Gustavo Forcelledo y Susana Hevia, al cayer nel momentu de la dimisión de la coordinadora autonómica tolos órganos de direición autonómicos y quedar automáticamente disueltos. Ésti va asumir les funciones correspondientes al día a día de la organización hasta la convocatoria d'una Asamblea Ciudadana, ensin fecha prevista.

Nesi sen, la diputada de la formación na Xunta Xeneral, Cova Tomé, esixó qu'ésta se convocara urxente, asina como un aconceyamientu con Ione Belarra, secretaria xeneral de Podemos. Sí ta confirmada la celebración el 6 d'ochobre n'Avilés un alcuentru militante "pa trabayar sobre la fueya de ruta de Podemos nel contestu políticu actual", apunten dende'l Conseyu de Coordinación de Podemos Asturies, qu'agradez a Castañón "la so dedicación fonda a Podemos y a Asturies a lo llargo d'estos años" y llamenta "les circunstancies que conduxeron a esta decisión".

Na imaxe, Fernández Castañón. Semeya propiedá de Podemos Asturies.