Fernández Pardo y Hugo Morán defendieron el consensu pa que nun se pierda l'asturianu

Pilar Fernández Pardo protagonizó la sorpresa na Xornada de la Fundación Caveda y Nava al espresase nun asturianu bien correchu na so intervención énte'l públicu qu'asistió al Monesteriu de Valdediós a los actos entamaos pola Fundación Caveda y Nava, que defende un consensu social de mínimos al favor de la llingua asturiana. La secretaria del PP de Xixón, con nun ser d'orixe asturianu nin asturianofalante, nun tuvo mayor problema n'espresase na lilngua de Marirrguera pa espresar el so compromisu por "unos mínimos válidos pa toos na defensa del asturianu" reconociendo que diba ser "una barbaridá que se perdiere la identidá llingüística d'Asturies" nel discursu curtiu col que se presentó como nueva patrona d'honor de la fundación.

Nun sorprendió que falare n'asturianu l'otru convidáu d'honor de la Fundación, l'Alcalde de L.lena Hugo Morán, que defendió na so intervención "el valor del asturianu como instrumentu de trabayu y entendimientu" mientres que la cuestión de la oficialidá quedó pa la segunda parte de la xornada que se celebró ayeri en Villaviciosa cola presentación del estudiu del profesor de Derechu Alministrativu de la Universidá d'Uviéu José Manuel Pérez Fernández. "El marcu llegal del asturianu: víes pal reconocimientu efectivu de los derechos llingüísticos" que ye como se llama'l so trabayu, parte de la necesidá d'apautar lo que ye'l significáu xurídicu de la oficialidá y qué tipu d'oficialidá pue concasar meyor cola realidá asturiana. L'espertu en lleis propón una oficialidá progresiva qu'iguale pasín ente pasu los derechos de los falantes d'asturianu y gallego-asturianu pero qu'ha pasar, eso si, pel enxertamientu de la oficialidá del asturianu na reforma del estatutu d'autonomía que ta acabante d'entamase.