Fernández Pardo ve nel patrimoniu cultural asturianu un "motor de desarrollu económicu y social"

La presidenta del PP de Xixón, Pilar Fernández Pardo, inauguró la Xornada de Lliteratura y Cultura Asturianes qu’entama l’Área de la Muyer del so partíu. Destacó que’l patrimoniu cultural del país pue ser “un motor de desarrollu económicu y social”.
 
“Asturies ufre un patrimoniu cultural que se constituyó a lo llargo de los sieglos nun legáu inmensu con vocación nidia de permanecer ente los asturianos, siendo, día tres día, elementu trescendente de la nuesa identidá que puestu en valor poles xeneraciones nueves pue estimular estraxes, reflexives y novedoses, qu’impulsen una industria cultural asturiana capaz de tresformar esti sector nun motor económicu y social”, afirmó Fernández Pardo. Nesi sen, destacó la importancia del “estudiu, la potenciación y la divulgación d’aquellos aspeutos que conformen la nuesa cultura, n’especial los más enraigonaos a l’asturianía, porque tán llamaos a convertise en base pa edificar un conocimientu ricu en diversidá y en pluralismu”.
 
Fernández Pardo fixo referencia a les pallabres del novelista y poeta portugués Miguel Torga, “lo universal ye lo llocal ensin paredes”, y señaló que “nun se pue percorrer el mundu ensin saber ónde ta l’aniciu del nuesu camín. L’Área de la Muyer del Partido Popular de Xixón sábelo mui bien y por eso quier contribuyir a que lo particular que nos define pueda tamién ser universal nun llugar nel que toos, más allá de les diferencies, atopámonos y reconocémonos”. Pela so parte, Elena González, responsable del Área de la Muyer, destacó “la contribución de la muyer” na lliteratura y cultura asturianes.
 
El primeru n’intervenir nestes xornaes qu’inclúin mitoloxía, llingua, creación audiovisual y lliteratura foi Alberto Álvarez Peña, que fixo una ‘Introducción a la etnografía asturiana” qu’arrancó los aplausos del públicu presente, ente’l que s’atopaba’l grupu municipal popular al completu y Xosé Nel Riesgo, direutor de la Fundación Municipal de Cultura, Educación y Universidá Popular. Álvarez Peña centróse nel patrimoniu inmaterial de tradición oral, “que ye un cachín de la etnografía”, y apuntó les posibilidaes que tien la tradición asturiana como fonte d’ingresos al traviés del turismu, al igual qu’asocede n’Alba, Breizh o Éire. Tres la so intervención, emitióse’l documental ‘Rincones secretos: mitología asturiana’, producíu por Canal Historia, nel que collabora’l propiu Álvarez Peña y Roberto González-Quevedo.
 
Restu d’actividaes
 
Completen el programa d’estes xornaes entamaes pol Área de la Muyer de PP xixonés la charra ‘Trés décades d’estudiu, promoción y defensa del patrimoniu llingüísticu’, a cargu d’Ana María Cano, presidenta de l’Academia de la Llingua Asturiana, y l’académicu y direutor de la Universidá Asturiana de Branu (UABRA), Xosé Antón González Riaño, y, yá pela tarde, la proyeición del documental ‘A bruxa de Brañavara’ (17 hores), a lo que va siguir una charra del xestor cultural Humberto Gonzali que va servir de ‘Introducción al doblaxe cinematográficu en llingua asturiana’ (17.45 hores). Amás, los presentes van poder ver una ‘Esbilla de cinema n’asturianu’ (18.10 hores) de 20 minutos de duración qu’inclúi delles escenes de doblaxes. Pa zarrar la xornada, a les 18.30 hores, la poetisa y narradora Aurora García Rivas va averar a los presentes la lliteratura asturiana en femenín cola intervención ‘Muyeres escritores n’asturianu y gallego-asturiano’.
 
Na semeya, Humberto Gonzali, Álvarez Peña, Fernández Pardo y González.