Fernández: “Parte de la militancia del Bloque por Asturies ta decepcionada col proyeutu de Compromisu”

Pablo Fernández, voceru del Bloque por Asturies en Gozón, afirma que “parte de la militancia” de la formación ta “decepcionada” col proyeutu de Compromisu. Esti sector va proponer una Xunta Nacional pa tratar esti asuntu.

En declaraciones feches a Asturies.com, el que fora candidatu a l’alcaldía de Gozón pola coalición Bloque por Asturies-Unidá Nacionalista Asturiana (UNA) nes municipales últimes señaló que “dende’l 8 de setiembre” una bona parte de la militancia del Bloque “entamó a quexase” sobre’l papel que ta xugando Compromisu por Asturies dende la so fundación el 23 de xunu. “Creemos que ye un proyeutu que nació vieyu y que nun ye capaz de superar lo anterior”, afirma Fernández, que considera un pasu atrás la estructura organizativa de partíu tradicional de Compromisu “cuando la cai demanda horizontalidá”. Nesi sen, critica que, nun primer momentu, se dixera que nun habría nengún representante de partíos na Executiva y qu’al final Yolanda Huergo, vocera d’UNA, fora tamién vocera de la federación de partíos. Por último, Fernández cree que’l discursu del proyeutu asturianista nuevu “nun se visibiliza de nenguna manera” y apuesta por siguir una llinia “más combativa y creativa”.

La intención d’esti seutor críticu del Bloque por Asturies ye la de proponer la celebración d’una Xunta Nacional de Compromisu pa tratar ésti y otros asuntos, siempre de manera constructiva. “Hai que revisar la trayeutoria y ver si lo qu’hai s’axusta al espíritu de lo que creíamos que diba a ser Compromisu”, afirma Fernández, que considera que “los conflictos sirven pa camudar les coses y esta situación que se ta viviendo en Compromisu pue tornase. Ye necesario reactivar a tol mundu”.