Femetal cifra en 30 millones d’euros les perdes por mor de la fuelga

La patronal del metal calcula que la fuelga del metal de dos díes que principió’l llunes provocó unes perdes de “unos 30 milones d’euros”. MCA-UXT y CC OO aseguren que’l siguimientu del paru foi de cerca del cien por cien.
 
Álvaro Alonso Ordás, secretariu xeneral de la patronal asturiana del metal (Femetal), tornó a insistir güei en que la fuelga foi “un fracasu” y comentó qu’ésta supón una falta de realismu por parte de los sindicatos que, ante la situación económica negativa y difícil, llastren entovía más la competitividá de les empresas y resta-yos credibilidá ante los clientes. Alonso, que cifró’l siguimientu de la fuelga nun 20 por cientu, tornó a facer un llamamientu a les centrales pa que retomen la mesa de negociación que “abandonaron de manera unilateral”.
 
Pela so parte, los sindicatos calificaron de “esitosu” el paru de 48 hores y aseguraron que’l so siguimientu foi casi total. MCA-UXT y CC OO esixeron a la patronal del metal “un replanteamientu de la situación, dende la responsabilidá y la sensatez”. Les dos federaciones entienden que l’ésitu d’esta primer fuelga debe servir pa que los empresarios reflexonen sobre los motivos que fixeron que sían tantos los trabayadores que “nun duldaron” sumase a la convocatoria. Sindicatos y patronal lleven aconceyándose dende hai cinco meses pa zarrar l’alcuerdu del conveniu del metal.