Felpeyu vuelve p'Australia con discu nuevu

El mes de marzu "Felpeyu" vuelve p'Australia na que va ser la tercer xira d'esti grupu xixones nes antípodes. Esta vegada van aprovechar pa presentar el so nuevu discu d'estudiu. Dende'l 3 de marzu hasta el 6 d'abril "Felpeyu" tará nel hemisferiu austral pa facer una xira con más de venti conciertos per tol país de los canguros. Ente toles actuaciones destaca la que van tener nel "Womad". "Womad" son les iniciales de "World of Music Arts and Dance", organización que nació nel añu 1983 gracies a la iniciativa del antiguu componente de "Genesis" Peter Gabriel. Dende entós p'acá esta organización, amás d'otres munches actividaes, organiza festivales per tol mundu, Australia, Grecia España, E.E.U.U...etc, son sedes d'esta importante rede internacional de festivales. Ente los conciertos tamién de destaquen los que van dar nel "Brunswick", barriu de la ciudá de Melbourne, o el "Port Fairy Festival" nel que ya tuvieron na primer xira. "Felpeyu" va llegar al país austral con nuevu discu baxo'l brazu. Depués d'una llarga espera, esta primavera ya vamos poder escuchar el nuevu trabayu d'estudiu de los xixoneses. El discu, que va llevar el nome de "Yá!", grabóse nos estudios estudios "Sinergia Digital" de Madrid, la grabación, mezcla y masterización fízola'l técnicu de soníu del grupu Salva López, la producción fízola'l propiu grupu. En total son doce temes, cinco cantaos con lletres de Boni Pérez, Ígor Medio y Ruma Barbero, hai muñeires, saltones y xirandiyes tocaos al estilu inconfundible de "Felpeyu". El cd va editáse primero n'Australia cola compañía "Secret Street" coincidiendo cola xira. Pal mes d'abril va ser cuando tengamos el discu n'Asturies y en tol estáu español, publicáu pol propiu grupu nun sellu creáu por ellos. Nel discu queda claro que los xixoneses siguen fíeles al so soníu, pero tamién se nota la esperiencia algamada que van dando los años, la meyor técnica adquirida y un bon procesu de grabación.