Felpeyu volvió al escenariu

L'Actu d'actu d'entrega de premios del XXVIII Día de Les Lletres Asturianes, que se celebró ayeri nel salón d'actos del IES Fernández Vallín de Xixón, contó con una actuación musical dalgo emocionante, pero que sobre too ye una perbona noticia pa los aficionaos al folk n'Asturies, Felpeyu volvió xubise al escenariu pa tocar y demostrar que se puede esperar muncho d'esti grupu nel futuru.

El grupu entendió esta actuación como una primer toma de contactu col directu, ya qu'en Felpeyu cambiaron dalgunes coses y tien el grupu tien que dir encontrándose nel escenariu. El desgraciu accidente del pasáu 24 de xunu fexo que se perdiera a dos pegoyos de la escena folk asturiana, Carlos "Loco" y Ígor Medio, arriendes de dos pieces fundamentales na maquinaria musical del grupu, como yeren la guitarra, el bouzouky y les voces principales. Pero viendo l'actuación d'ayeri vese que Felpeyu supo reinventase y, con dalguna modificación pequeña y una incorporación, Felpeyu sigue siendo coherente y lleal al so soníu. Asina, el que yera ún de los dos vigulinos Fernado Oyagüez pasa a tocar el bouzouky, y incorporase al grupu'l baxista Dudu Puente, qu'amás de furnir al grupu con una perbona base col so baxu/contrabaxu, pon la voz a los cantares de Felpeyu, otra de les marques de la casa que sigue presente nesta etapa nueva de la formación.

Otra novedá curiosa del grupu ye'l so apueste por tonalidaes nueves usando una gaita en LA, tonu bien raru na gaita asturiana por nun dicir enixistente, que según los miembros del grupu permite más estabilidá a los vigulinos, curdión, arriendes de ser un tonu más agrabadable a la oreya.

Pero esta etapa nueva de Felpeyu nun solo se ve nos miembros del grupu y na instrumentacón, ya que'l grupu interpretó ayeri un repertoriu nuevu dafechu de seiyes temes, ensin tirar de cantares de los sos discos, filosofía que cuenten con caltener polo menos un bon tiempu. Asina Felpeyu ta trabayando bien duru pa completar un repertoriu pa entamar a xubise a los escenarios pa mediaos d'esti mesmu branu. Con too y con ello, el próximu 22 de xunu, na playa de Poniente de Xixón, Felpeyu va actuar nel macrohomenaxe a Ígor y Carlos que se ta preparando dende va unos meses, y onde van actuar grupos de rock y folk de primer nivel interpretando pieces de Los Locos y Felpeyu.