Felpeyu va poner la música a un festival de Guilandeiros

La Puela d'Allande acueye esti fin de selmana'l I Alcuentru de Guilandeiros
n'Allande. Pa la xornada del sábadu 11 hai preparaes una riestra d'actividaes, ente les
que tenemos la presentación d'un llibru sobre l'aguilandu y un conciertu
de Felpeyu, y el domingu 12, un ruxidoiru de guilandeiros van caleyar les
parroquies d'Allande pa ver, en vivo y en directo, l'espectáculu de los
guilandeiros.



L'antroxu
ta acercándose n'Asturies, y una de les manifestaciones más
tradicionales n'Asturies d'esti tiempu son los Aguilandos y Les Comedies. Nel
conceyu del surrocidente asturianu d'Allande quieren da-y puxu a esta
tradición y pa ello l'asociación de muyeres "Rio
Nisón" y la Xunta pola Defensa de la L.lingua Asturiana del
Occidente entamen esti I Alcuentru de Guilandeiros n'Allande. Les actividaes
d'esti alcuentru entamen esti sábadu 11 de febreru a les 20:30 hores
cola presentación del llibru "L'Aguilandu nel Suroccidente
d'Asturias", escritu por Naciu'i Riguilón nel que se fai un estudiu
de los aguilandos nel surrocidente astur, centrando l'estudiu nos pueblos de
Xedré y Allande y otros pueblos de la redolada. Amás, el llibru
vien con material gráficu abondo, con semeyes d'aguilandos antiguos,
pero tamién con dellos de más de recién.



Esta presentación va facese nel Café Centro en La Puela, sitiu
onde tamién va facese, a partir de les 23:00 hores, el Conciertu
d'Antroiru, nel que va tocar el grupu xixonés
Felpeyu. La entrada pal conciertu ye de
baldre y depués de l'actuación del grupu de folk va haber una
xuntanza de músicos, too pa que nun quede momentu de la nueche ensin
música.



Al día siguiente, a partir de les 11:00 hores, va completase l'axenda
d'actos d'esti Alcuentru con un ruxidoiru de guilandeiros, que van dir per
dalgunos pueblos de les parroquies d'Allande. Los guilandeiros va dir peles
cases de los pueblos ufiertando'l so espectáculu a cambiu de perres, que
gasten otru día nuna folixa. L'espectáculu que los guilandeiros
ufierten de casa en casa ye una xuntanza ente la música, qu'esti
añu cuenta cola participación de músicos de Felpeyu,
arriendes d'otros instrumentistes nel ruxidoiru de la nueche anterior, y un
espectáculu teatral de comedies, que n'Allande tien una riestra de
personaxes fixos como El Blancu, El Ciegu o La Parturienta. Pa que los
guilandeiros nun pierdan fuerces nuna xera tan cansada, esti caleyar pelos
pueblos d'Allande va acompañalu feisuelos, l.linguaniza ya vino asgaya.