Día del Llibru Asturianu

Felicitación a Carreño "por mantener per tantos años la producción teatral n'asturianu"

|
Captura programa del XXX Salón de Teatru Costumista Asturianu

Iniciativa pol Asturianu celebra l'apuesta del Conceyu pol Salón de Teatru Costumista Asturianu y solicita l'emplegu del idioma "en más ámbitos del trabayu municipal".

Dende ayeri celébrase en Candás la trentena edición d'esti certame, que de manera diaria presenta obres nel Teatru Prendes. L'asturianu ye la llingua habitual del teatru costumista del país y dende l'Ayuntamientu de Carreño s'incorpora tamién esti idioma en cartelería y programa.

Iván Llera, presidente d’Iniciativa pol Asturianu, aseguró esta mañana que "ye una bona noticia ver la continuidá de la presencia del asturianu na campaña informativa del XXX Salón del Teatru Costumista asturianu" y felicitó al Conceyu de Carreño por ello. "L'usu de la llingua asturiana na cartelería y folletos d’esti alcuentru ye un exemplu pa emplegar en más ámbitos del trabayu municipal. Ye importante siguir trabayando na presencia del asturianu en diferentes campañes del conceyu", añadió.

Tamién quixo ampliar esi agradecimientu al Teatru Prendes y a les munches persones que trabayen por facer posible esti espardimientu del teatru n’asturianu. "L’usu normal del idioma yá ta afitáu nesti alcuentru y queremos treslladar la nuesa felicitación por mantener per tantos años la producción teatral n’asturianu”.

‘¡Ai, si fuera asina!’, güei

El Salón de Teatru Costumista Asturianu sigue esta nueche cola representación de la segunda función, ‘¡Ai, si fuera asina!’, que va representar l’Agrupación Artísticu-Cultural Padre Coll, de La Felguera. Va ser a les 23 hores y les entraes van salir a la venta una hora enantes al preciu de 6 euros, de 4 pa los socios.

Contador Estadistiques