Febreru n’asturianu en Llangréu

"Febreru n'asturianu" ye un ciclu que celebra la so segunda edición y nel que se programen conferencies n'asturianu sobre los temes más diversos. El ciclu compónse esti añu de trés conferencies. La primera d'elles, alredor del Antroxu, dióla'l pasáu día 2 Berto Peña, el famosu dibuxante y espertu en mitoloxía asturiana que ye tamién ún de los responsables de la Fundación Belenos y la so prestixosa revista "Asturies, memoria encesa d'un país". L'investigador dedicóse a esponer les munchísimes diferiencies que se dan ente l'antroxu tradicional y el modernu

El ciclu sigue esti miércoles, 16 de febreru, va dar la conferencia Mª Bárzana Prieto, diplomada en logopedia ya integrante de l'Asociación cultural Azabache de Xixón, que va falar sobre Foniatría y Logopedia n'asturianu, esplicando los distintos trestornos del llinguaxe y el mou más afayadizu de tratalos dende un puntu de vita xeneralista, amenu y prestosu pa tolos públicos. Por último, Antonio A. de la Torre, doctoráu n'Historia del Arte, Espertu en Filoloxía Asturiana y Especialista n'Audición y Llinguax va dar la conferecia "De la lliteratura al arte. Dos exemplos n'asturianu: Nel Amaro y Ánxel Nava". Ello va ser pal otru miércoles, día 23 de febreru, siempre na Casa de la Cultura de Sama y n'horariu de les ocho de la tarde