Farias: “La UABRA funciona, como amuesa’l tiempu que lleva y la cantidá de xente que participa nella”

El xeólogu Pedro Farias Arquer foi’l segundu conferenciante d’esta edición de la Universidá Asturiana de Branu (UABRA). Na so primer esperiencia nos cursos destacó’l bon ambiente que se vive en Cangas del Narcea y la importante participación.

El salón d’actos del IES Cangas del Narcea acoyó’l xueves pasáu la conferencia ‘Industria estractiva, impautu ambiental y recuperación ecolóxica d’Asturies’ impartida por esti Doctor en Xeoloxía y profesor titular del Departamentu de Xeoloxía de la Universidá d’Uviéu. Farias, na so intervención, faló de les posibilidaes téuniques qu’hai na rehabilitación d’una cantera a cielu abiertu que finara la so esplotación. “Ye posible da-yos un valor ecolóxicu y social”, apuntó l’espertu, que punxo dellos exemplos. Asina, esplicó l’alternative qu’ufren delles instalaciones pa convertir la infraestructura minera abandonada nuna llaguna o inclusive nuna pumarada, como se fixo nes cuenques con mines de carbón a cielu abiertu.

Farias amosó la so satisfaición por participar per primer vegada na UABRA, una iniciativa de l’Academia de la Llingua Asturiana que “funciona, como amuesa’l tiempu que lleva”, faciendo referencia a los cursos que se facíen n’Ibias y que tienen continuidá agora en Cangas, “y la cantidá de xente que participa nella”. Tamién destacó l’ambiente prestosu que se vive nos cursos y les posibilidaes comunicatives del asturianu.

Güei, conferencia en gallego-asturiano

El filólogu y baxu del grupu Bacotexo, Ricardo Saavedra Fernández-Combarro, va impartir esta tarde (19 hores, salón d’actos del IES Cangas del Narcea), la conferencia ‘A ironía como rasgo estructural asturiano’. Esta charra, la tercera de les cuatro previstes na UABRA, va ser en gallego-asturiano.

Otra manera, ayeri principió’l segundu turnu de los ‘Cursos d’Afondamientu Cultural y Llingüísticu’. Asina, hasta’l vienres, xornada cabera de la UABRA, van dase los cursos ‘Xestión cultural n’Asturies: xestionando llingües y cultures’, con Isabel Hevia Artime como profesora; ‘El Navia-Eo: espacio, cultura y futuro’, a cargu de José Antonio Fernández Vior; y ‘Asturies y la so historia recién’, dirixíu por Rubén Vega García.