FAMYR sigue col homenaxe a García Granda y Comandante Robert

Unes selmanes atrás FAMYR presentó la propuesta de conceder a Cristino García Granda’l títulu de “Fíu Predilectu d’Asturies” y a José Antonio Alonso Alcalde, conocíu como Comandante Robert, la Medalla d’Oru d’Asturies.

Nesti sen, FAMYR llama a que la xente interesao sofite la campaña “Cristino García y Comandante Robert, fíos predilectos de l’Asturies antifacista”. Na mesma llínia, l’asociación de memoria histórica ta preparando una nueva edición del festival RepúblicAstur, qu’esti añu dirá n’homenaxe a los dos personaxes citaos.

“Dambos son parte d’esa historia inorada de la llucha pola llibertá y contra’l fascismu, como tantos que nun queremos olvidar; Vitiní, Zapico, Moyano, Artime, miles d’asturianos que entá güei siguen nes cunetes del abandonu”, señala FAMYR.

Cristino García Granda
Cristino García Granda nació n’El Ferriru, Gozón, Asturies, el 3 de xunu de 1913. Lluchó na revolución del 34 n’Asturies, na Guerra Civil Española y na II Guerra Mundial, como teniente coronel na resistencia francesa al mandu de les brigaes españoles de los departamentos de Lozère, Ardèche y Gard.

Más tarde volvió a España pa lluchar contra’l réxime facista p’acabar asesinánlu’l franquismu en Madrid en 1946. Francia zarra la so frontera dos años como protesta pol asesinatu y concéde-y el grau d’Héroe Nacional de Francia.

De l’almiración y el respetu que’l pueblu francés tien por Cristino da idea’l que depués de que lu asesinaren, el Parlamentu francés presenta una moción que vota por unanimidá, que diz:

<<L’Asambléa Nacional Constituyente recibe, con indignación y dolor, la noticia de la execución de Cristino García y de los sos compañeros de llucha, afusilaos pol odiu a la llibertá que fueron defendiendo na nuestra tierra. L’Asambléa traduz la protesta de la conciencia francesa con esta aplicación nueva de métodos de represión condenaos pol mundu civilizau. L’Asambléa invita al Gobiernu francés a que se prepare la rompedura col Gobiernu de Franco. La llibertá naz siempre del sangre de los mártires>>.

José Antonio Alonso “Comandante Robert”
José Antonio nació’l 14 d’abril de 1919 en L’Entregu, Asturies. Gárralu’l golpe d’estáu y la guerra civil en Cataluña. Participa nes movilizaciones qu’organiza’l gobiernu de la República, pasa la frontera en 1939, y yá en Francia participa obligatoriamente nos batallones de trabayu. En 1942 incorpórase al XIV Cuerpu de Guerrilleros, detiénenlu y métenlu nun autobús camín de Mauthausen y arréglase pa escapar.

Más tarde nómenlu xefe del Estáu Mayor de la 3ª Brigada de Guerrilleros Españoles, al frente de 300 guerrilleros. Participa nos combates de Rimont-Prayols y castelnau Durban; la fazaña más brava foi lliberar la ciudá de Foix.

Caballero y Oficial de la Lexón d’Honor de Francia. Caballero de la Lexón de la República Polaca, medalla de Llealtá a la República Española, Roseta de Primer Orde Nacional francés, Ciudadanu d’Honor de la ciudá de Foix son algunes de les distinciones que recibió José Antonio Alonso, conocíu como Comandante Robert.