Falten osos

La Coordinadora Ecoloxista d'Asturies espardió ayeri una nota de prensa quexándose poles anuncies trunfalistes que ta faciendo de va delles selmanes p'acá la Conseyería de Mediu Ambiente sobre la recuperación de la población asturiana d'osos. La Coordinadora diz que les cuentes qu'echa l'alministración ye fácil que nun concueyen cola realidá, y ello d'alcuerdu a dellos criterios, ente los que dan la falta de mecanismos de verificación de la población y la falta de métodu pa contar los exemplares. Nesti sentíu, los ecoloxistes dicen que los recuentos namás falen de oses con esbardos, que nun ye, nin con muncho, el total de la población. Aparte d'esto, nun se dan rexistros de muertes nin de distribución de grupos familiares.

Otramiente, les estimaciones que da'l Principáu sobre la tendencia a la recuperación del osu n'Asturies abúlten-yos engañoses a los ecoloxistes, que dicen que, anque nel meyor de los casos pueda falase d'una xuba de población del 0'6% al añu ello ye sobre un total que nun pasa de los cientu y picu osos, colo que la especie seguiría, igual que va venti años, raspiando'l desanicie.