“Fala” música pola oficialidá

Gracies a una iniciativa conxunta del colectivu "Músicos pola oficialidá" la casa de discos avilesina "L'Aguañaz" y la Xunta pola Defensa de la Llingua, el mes qu'entra va asoleyase n'Asturies un CD-single abondo especial. Anque'l Cd-single namás va tener ún solu tema musical, la Xunta pola Defensa de la Llingua quier facer d'elli un nuevu himnu pa la reivindicación de la oficialidá del asturianu y la normalización del idioma.

Ello ye que fuerza musical nun-y va a faltar al tema. Según pudo saber Asturies.com, el colectivu "Músicos pola oficialidá" que ye'l que ta trabayando la parte musical del proyectu, axunta a delles de les mayores estrelles del panorama musical asturianu. Ente ellos tan la plantiya de Dixebra cásique entera, con Xune Elipe, Fernando Rubio, Javi Rodríguez y Primi Abella, amás de músicos del grupu "Tarañu" o'l cantautor Toli Morilla, anque la nómina de participantes nesti nuevu esperimentu musical ye entovía muncho más llarga, contándose con especialistes de distinta formación. Con esti amiestu d'influyencies y tendencies, sabiamente remanáu pol productor Sergio Rodríguez, responsable de los últimos trabayos de Dixebra o La Bandina, el resultáu promete ser de lo más rompedor, y los responsables del proyectu adelantaron a Asturies.com que va tratase d'un tema "nel que va mandar el soníu funky y que tamién va tener estribillos rockeros".

Los autores entovía nun tan en condiciones de facilitar la lletra completa del cantar, pero sí qu'adelanten que'l tema va entitulase "fala" y que la so lletra va tresmitir mensaxes positivos sobre l'asturianu, llamando l'atención sobre la necesidá d'emplegar la llingua en tolos contestos comunicativos pa qu'esta nun desapaeza. La intención declarada de los componentes de "músicos pola oficialidá" ye la de facer un cantar comercial y pegañosu a la oreya col enfotu de que se convierta "nel cantar del branu". Pa da-y más presencia, el CD-single va venir enxertu nuna carpeta-trípticu de cartón con abondancia de semeyes y material gráfico.