“Fala” la banda sonora del día de les lletres

La Xunta Pola Defensa de la Llingua Asturiana presentó esta mañana'l single "Fala" qu'asoleya conxuntamente cola casa de discos L'Aguañaz y el colectivu "músicos pola oficialidá"

Xulio Casado en representación de la Xunta y Xune Elipe pola casa L'Aguañaz tuvieron nel actu de presentación, nel que Casado definió esta iniciativa como un "apueste en positivo" que va intentar ser la "banda sonora del dia de les lletres". El CD-Single sal gracies a una iniciativa conxunta la casa de discos avilesina "L'Aguañaz" la Xunta pola Defensa de la Llingua y el colectivu "Músicos pola oficialidá" que ye'l que trabayó la parte musical del proyectu. En "Músicos pola oficialidá" axúntense delles de les mayores estrelles del panorama musical asturianu. Ente ellos la plantiya de Dixebra cásique entera, con Xune Elipe, Fernando Rubio, Javi Rodríguez y Primi Abella, amás de músicos del grupu "Tarañu" o'l cantautor Toli Morilla, anque la nómina de participantes nesti nuevu esperimentu musical ye entovía muncho más llarga, contándose con especialistes de distinta formación. Con esti amiestu d'influyencies y tendencies, sabiamente remanáu pol productor Sergio Rodríguez, y con una envuelta diseñada por Cuerpo 7, "Fala", que nun va vendese peles canales comerciales normales como tiendes y supermercaos, va tar disponible en tolos actos qu'organice la Xunta pola Defensa de la llingua, entamando pola manifestación del próximu día 6 de mayu que la Xunta organiza tradicionalmente con motivu del Día de les Lletres.

Xulio Casado presentó tamién datos sobre la manifestación, que va salir el próximu día 6 de mayu de la Estación de la Renfe d'Uviéu a les 7 de la tarde. Amás de convidar a tol mundu a participar na convocatoria, que llega pa la Xunta "nun momentu clave pal asturianu como ye'l de la reforma estatutaria, nel que ye preciso demostrar la fuerza de la reivindicación de la oficialidá". Casado esplicó que, anque la Xunta suel facer salir tolos años la manifestación del Paséu de los Álamos, cuando los representantes de la Xunta acudieron a Delegación del Gobiernu pa pidir el permisu, respondiéron-yos que'l llugar yá taba acutáu previamente pola organización política Andecha Astur pa otra manifestación, polo que foi preciso cambiar de llugar.